«Քաղաքացիները հաճախ վճարում են, սակայն ոչինչ չեն ստանում». Պեդրո Զարոկյան

Երևանի ավագանու ընդդիմադիր անդամ Պեդրո Զարոկյանը ֆեյսբուքյան իր էջում գրել է «Ստացել եմ բողոքներ հանրային տարածքներում տեղադրված սուրճի ավտոմատների վերաբերյալ, որոնց վրա որևէ հեռախոսահամար նշված չէ։ Արդյունքում քաղաքացիները հաճախ վճարում են սուրճի համար, սակայն ոչինչ չեն ստանում՝ կորցնելով իրենց գումարը և չունենալով որևէ հնարավորություն կապ հաստատելու և գումարի վերադարձ պահանջելու համար։
Ես դիմել եմ քաղաքապետարանին՝ պահանջելով պարտադիր դարձնել, որպեսզի ինչպես հանրային, այնպես էլ մասնավոր տարածքներում տեղադրված բոլոր սուրճի ավտոմատների վրա նշվեն դրանց սեփականատերերի կամ սպասարկող կազմակերպությունների հեռախոսահամարները։
Բացի այդ, պահանջել եմ, որ քաղաքապետարանը նույնպես տրամադրի իր կապի տվյալները, որպեսզի քաղաքացիները կարողանան տեղեկացնել քաղաքապետարանին այն անբարեխիղճ սուրճի ավտոմատների սեփականատերերի մասին, որոնք չեն վերադարձնում քաղաքացիների կորցրած գումարը։ Ինչպես միշտ, քաղաքապետարանը պատասխանել է հերթական գրությամբ՝ մեջբերելով օրենքների ու իրավական ակտերի մի ամբողջ ցանկ և նշելով, որ «կքննարկեն» հարցը»։