«Ջրերին՝ ռազմավարական ռեսուրսին, անլուրջ եք վերաբերվել». Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը. «Ջրերին՝ ռազմավարական ռեսուրսին, անլուրջ եք վերաբերվել
Դիլիջանում ընթացող «Ջրային ոլորտի բարեփոխումներ 2026-2031» աշխատաժողովում Նիկոլ Փաշինյանը հայտարարել է, որ Հայաստանում չկա խմելու և ոռոգման ջրի խնդիրներից զերծ որևէ բնակավայր, թեև երկրում ձևավորվում է բավարար ջրային ռեսուրս։ Աշխատաժողովում առաջարկվել է «բարեփոխումից» անցնել «ջրային վերափոխման» օրակարգին, որի նպատակներն են՝ մշակել հստակ ճանապարհային քարտեզ, ապահովել շուրջօրյա խմելու և ոռոգման ջրի հասանելիություն, ձևավորել օբյեկտիվ սակագնային համակարգ, ազատականացնել ջրի շուկան մասնավոր ներդրումների համար և բացառել չմաքրված հոսքաջրերի արտանետումը բնություն։
Սրանք ո՞վ պետք է աներ, Փաշինյանն ավելի քան 8 տարվա վարչապետ է, սակայն ընդդիմադիր պատգամավորին հարիր ելույթ է ունեցել։ Անցած 8 տարում անգործության եք մատնվել, մսխել պետբյուջեի և վերցված մեծ վարկերի փողերը, սակայն ջրային ռեսուրսների արդյունավետ կառավարման գործում գործ չեք արել: Միայն թափով ժողովներ եք անում, խրոխտ ելույթներ ունենում։ Սակայն ռազմավարական ռեսուրս հանդիսացող ջրերին անլուրջ եք վերաբերվել։ Կառավարության 5 տարվա ծրագրով 17 ոռոգման ջրամբար պետք է կառուցեիք, սակայն միայն Վերդիի ջրամբարն եք կառուցել: Մեր սարերի ջրերը շարունակում են հոսել Ադրբեջան, ոռոգել այդ երկրի դաշտերն ու այգիները, իսկ դուք գործ անելու փոխարեն ճառում եք ջրերի մասին»: