«Ոչ ոք չի ուզում դատել Կաթողիկոսին․ ով դատեց, մարդիկ չեն մոռանա նրա անունը»․ Լիանա Խաչատրյան

Լրագրող Լիանա Խաչատրյանի ֆեյսբուքյան գրառումը․ «Մի առանձին հաճույք է հետևել Կաթողիկոսի շուրջ ձևավորվող գործընթացին։ Մասնավորապես խոսքը իրար ետևից դատից խուսափող դատավորների մասին է։ Բացատրեմ՝ ինչու։
Մաքս Վեբերը, եթե ճիշտ եմ հիշում, առանձնացնում էր իշխանության մի քանի տեսակ՝ ավանդական, խարիզմատիկ և ռացիոնալ։ Հիմա Եկեղեցին ավելի շատ հարում է ավանդականին, իսկ դատարանը՝ ռացիոնալ-իրավական է։ Ու մենք տեսնում ենք հետաքրքիր պատկեր, թե ինչպես է վերջինն ընկրկում առաջինի առջև։
Սրանով ինձ մոտ նախ կասկած է առաջանում, որ ռացիոնալի մոտ ամեն ինչ այնքան լավ չէ։ Կամ ինքն իր առաքելությանը չի հավատում, կամ գործը չի համապատասխանում իր առաքելությանը, կամ երկուսը մեկում։ Իսկ ահա ավանդականն իր գործը լավ գիտի։ Տոտալ աղմուկի մեջ պահպանել քար լռությունը։ Չմասնակցել լեզվակռվին և այդպիսով պահպանել սեփական սակրալության երանգը։ Եվ սա հիացնող աշխատում է։

Անկախ պաշտոնական բացատրություններից, սրտի խորքում բոլորս էլ գիտենք, թե ինչից են վախենում դատավորները։
Ոչ ոք չի ուզում դատել Կաթողիկոսին։ Անկախ նրանց վերաբերմունքից կոնկրետ Գարեգին Բ-ին։ ՈՉ ոք չի ուզում դատել Կաթողիկոսի աթոռին նստածին։ Մտավախություններն արդարացված են։ Քաղաքական ուժերը կգան ու կգնան, ժամանակները կփոխվեն, իսկ մարդիկ չեն մոռանա նրա անունը, ով Կաթողիկոսին դատեց։ Ռիսկը մեծ է։ Վախը շատ։

Կողքից՝ մի վեհաշուք տեսարան։ Ֆիլմ կարելի է նկարել այս մասին»։