«Ադրբեջանը հայկական գերեզմաններ է ավիրում, դուք խաղաղության մասին եք դայլայլում». Ոսկան Սարգսյան

Լրագրող Ոսկան Սարգսյանի ֆեյսբուքյան գրառումը. «Ադրբեջանը հայկական գերեզմաններ է ավիրում, դուք խաղաղության մասին եք դայլայլում
Ադրբեջանի իշխանությունները Շուշիում հերթական մշակութային վանդալիզմն են իրականացրել՝ հիմնահատակ ավերելով քաղաքի պատմական Հին հայկական-ռուսական գերեզմանոցը: Այս մասին փաստագրված տվյալներ է հրապարակել Caucasus Heritage Watch (CHW) միջազգային մոնիթորինգային կազմակերպությունը։
Նիկոլ Փաշինյանը և իր սազանդարները անընդհատ խոսում են Ադրբեջանի հետ հաստատված խաղաղության մասին, սակայն Ադրբեջանը 2020 թվականի պատերազմից 6 տարի անց Հայաստանի հետ խաղաղության պայմանագիր չի կնքել, ՀՀ ինքնիշխան տարածքներից իր օկուպացիոն զորքը չի հանել, Բաքվից հայ գերիներին չի ազատել, հակահայկական քարոզչությունը չի նվազեցրել, հայկական եկեղեցիների ու գերեզմանոցների ավերումը չի դադարեցրել։ Պատմությունը դաժան դասեր է տալիս ցանկալին իրականի տեղ անցկացնողին, տևական, սակայն փխրուն հրադադարը կայուն, արդար խաղաղություն համարողներին»: