«Շուշիի յուրաքանչյուր ոչնչացված գերեզման վկայում է ոչ թե պատմության ավարտի, այլ այն ջնջելու փորձի մասին»․ ԴՕԿ

ԴՕԿ կուսակցությունը հայտարարություն է տարածել․ «ԴՕԿ կուսակցությունը խստորեն դատապարտում է Ադրբեջանի կողմից Շուշիում հայկական և ռուսական գերեզմանների, պատմամշակութային ու հոգևոր ժառանգության համակարգված և բարբարոսական ոչնչացումը։
Մարդու հանգստավայրի նկատմամբ անգամ պատերազմը պետք է ունենա բարոյական սահմաններ։ Գերեզմանների պղծումն ու ոչնչացումը ոչ թե պարզապես մշակութային արժեքների վնասում է, այլ մարդկային արժանապատվության, միջազգային հումանիտար իրավունքի և համամարդկային բարոյական նորմերի կոպիտ ոտնահարում։
Շուշիի հայկական գերեզմանները հայկական ժողովրդի պատմական ներկայության կենդանի վկայությունն են, իսկ ռուսական գերեզմանների ոչնչացումը ևս մեկ անգամ ցույց է տալիս, որ Ադրբեջանի գործողությունները դուրս են որևէ «վերականգնման» կամ «քաղաքաշինության» տրամաբանությունից և կրում են պատմական հետքի վերացման բնույթ։
ԴՕԿ կուսակցությունը կոչ է անում միջազգային իրավապաշտպան և մշակութային ժառանգության պահպանությամբ զբաղվող կառույցներին՝ պատշաճ իրավական գնահատական տալ կատարվածին, պահանջել Ադրբեջանի կողմից նման գործողությունների անհապաղ դադարեցում և ապահովել Շուշիի գերեզմանատների ու պատմամշակութային ժառանգության միջազգային վերահսկողությունը։
Պատմությունը կարելի է փորձել կեղծել, բայց հնարավոր չէ ոչնչացնել այն գերեզմաններով, քարերով ու հիշողությամբ։
Շուշիի յուրաքանչյուր ոչնչացված գերեզման վկայում է ոչ թե պատմության ավարտի, այլ այն ջնջելու փորձի մասին»։