Թրամփը հայտարարել է, որ ԱՄՆ-ն կապի մեջ է հուսիների հետ

ԱՄՆ-ի նախագահ Դոնալդ Թրամփը հայտարարել է, որ Վաշինգթոնը մշտական ​​կապի մեջ է իրանամետ եմենյան «Անսար Ալլահ» շարժման հետ, հաղորդում է Fox News-ը։

«Նախագահը (Դոնալդ Թրամփը) ասել է, որ Միացյալ Նահանգները մշտական ​​կապի մեջ է հուսիների հետ, և որ նրանք համաձայնել են չմասնակցել Միացյալ Նահանգների դեմ մարտական ​​գործողությունների»,- հեռուստաալիքին հաղորդել է լրագրող Թրեյ Յինգսթը։

Նրա խոսքով՝ ամերիկացի առաջնորդը շաբաթավերջին Եմենում ստեղծված իրավիճակն անսովոր չի համարում։ «Նա այս շաբաթավերջը բնութագրել է՝ որպես ոչ մի այլ շաբաթավերջից չտարբերվող՝ չնայած տարածաշրջանում ԱՄՆ-ի քաղաքացիներին ուղղված նախազգուշացումներին», - նշել է Յինգսթը։

Ավելի վաղ Մերձավոր Արևելքի մի շարք երկրներում ԱՄՆ-ի դեսպանատները կրկին հիշեցրել են ամերիկացիներին տարածաշրջանում լարված իրավիճակի պատճառով զգոն մնալու անհրաժեշտության մասին։ Հորդանանում, Իսրայելում, Իրաքում, Կատարում, Բահրեյնում, Սաուդյան Արաբիայում, Օմանում, Արաբական Միացյալ Էմիրություններում և Լիբանանում ԱՄՆ-ի դիվանագիտական ​​առաքելությունները հայտնել են, որ Մերձավոր Արևելքում լարվածության պատճառով անվտանգության իրավիճակը շարունակում է մնալ մարտահրավերային՝ անսպասելի սրման հնարավորությամբ։