«Չորս տարի առաջ այս օրը Սերժ Սարգսյանի գլխավորած ռեժիմը սպանեց Յուրի Տեփանոսյանին»․ Ժ․ Սեֆիլյան

Շուշիի առանձնակի գումարտակի հրամանատար, «Սասնա Ծռեր» կուսակցության անդամ Ժիրայր Սեֆիլյանը ֆեյսբուքյան իր էջում գրել է. «Չորս տարի առաջ այս օրը՝ հուլիսի 30-ին, Սերժ Սարգսյանի գլխավորած ռեժիմն սպանեց երիտասարդ ոստիկան Յուրի Տեփանոսյանին։

Ռեժիմը երկու նպատակ ուներ՝ հրեշացնել ապստամբած Սասնա Ծռերի կերպարը և Յուրիի ծառայակից ընկերների շրջանում հոգեբանորեն շարժառիթ ստեղծել ՊՊԾ գնդում գտնվող Սասնա Ծռերի վրա գրոհելու համար, քանի որ ոչ մեկը հանուն Սերժ Սարգսյանի պատրաստ չէր վտանգելու իր կյանքը։

Չեկիստական անմարդկային և արյունոտ ժառանգությամբ սնված և գործող ռեժիմի համար դա փորձված մարտավարական հնարք էր։ 2008թ. մարտի 1-ին նույն ձեռագրով սպանվեց ոստիկանական զորքերի ժամկետային զինծառայող Տիգրան Աբգարյանը, ինչին հաջորդեց ժողովրդի ջարդը։

Յուրի Տեփանոսյանի քստմնելի սպանությունից անցել է չորս տարի, այդ ընթացքում իբրև թե հեղափոխություն է եղել և ձևավորվել է ժողովրդի քվեով ընտրված իշխանություն, սակայն նախկին ռեժիմի գործած այդ ոճիրը ոչ միայն մնացել է անպատիժ, այլև նրա թխած նույն կեղծ մեղադրանքով դրա համար ամբաստանվում և բանտում է պահվում Սասնա Ծռեր խմբավորման անդամ Սմբատ Բարսեղյանը։

Գործող իշխանության թեթև ձեռքով շուտով կավարտվի Սասնա Ծռեր խմբավորման ապստամբների գործի դատաքննությունը։ Դրա ելքը լինելու է մեղադրական, ինչի պատասխանատվության ծանր բեռը կոտրելու է իշխանության ողնաշարը։

Ներկայիս իշխանությունը չի գիտակցում իր առաքելությունն ու պատասխանատվությունը։ Նա իրեն դիրքավորել է որպես նախկինի իրավահաջորդ և ըստ էության կոծկում է նրա ոճրագործությունները և շարունակում է նրա գործը։ Ասվածի ևս մեկ վկայություն է ապստամբության ժամանակ՝ հուլիսի 29-ին, Սարի թաղի բնակիչների, այլ քաղաքացիների և լրագրողների ջարդի գործը ներկա իշխանության օրոք և ձեռամբ կարճելը և մեղավորներին անպատիժ թողնելը։

Ինձ համար, իհարկե, դժվար է նման արձանագրումներ կատարել, սակայն փաստերը զորավոր են։

Յուրի Տեփանոսյանի հրեշային զոհաբերության մասնակիցները չեն կարող անպատիժ մնալ։

Հայաստանում շատ մոտ ապագայում հաստատվելու է իրավունք և արդարություն, բացահայտվելու են ոճրագործներն ու նրանց հետ գործարքներ կնքածները և այս երկուսն էլ կանգնելու են դատարանի առաջ։

Օրվա առիթով հիշենք և խնկարկենք Յուրի Տեփանոսյանի և իրարահաջորդ ոճրագործ ռեժիմներին զոհ գնացած մեր բոլոր հայրենակիցների հիշատակը»։