«Հերոսաբար հետ է շպրտել թշնամուն նաև սովամահության մատնված Գողթանը». Նժդեհի նամակը ՀՀ զինվորական նախարարին

Պատմաբան Արշալույս Զուրաբյանը ֆեյսբուքյան իր էջում հրապարակել է Գարեգին Նժդեհի նամակը ՀՀ զինվորական նախարար Ռուբեն Տեր-Մինասյանին՝ թշնամու պարտության և Նախիջևանի ազատագրումն արագացնելու մասին։
«Նոյեմբերի 3-ին թշնամին մեծ ուժերով (20-րդ ու 28-րդ կարմիր հեծյալ բրիգադներ) Բարգուշատի թրքությունը և 400 տաճիկ (թուրք) ասկյարներ, Ռուսաստանից բերված գերիներ, որոնց զինել են Գորիսում, կրկնեց իր հարձակումը Ղափանի հյուսիս-արևելյան գյուղերի վրա։ Կռիվներն աննախընթաց համառությամբ ու կատաղությամբ տևեցին չորս օր և վերջացան թշնամու պարտությամբ։ Թշնամին թողել է 250-ի չափ դիակներ, մի քանի տասնյակ գերիներ և վեց գնդացիր։ Հերոսաբար հետ է շպրտել թշնամուն նաև սովամահության մատնված Գողթանը։ Արագացրեք Նախիջևանի գրավումը»։
8 նոյեմբերի, 1920թ
Ղափանի հանքեր
ՀԳ - Նժդեհը լուր չուներ, որ թշնամին նոյեմբերի 7-ին մտել է Ալեքսանդրապոլ։ Նրան վիճակված էր միայնակ շարունակել պայքարը ռուս-թրքա-թաթարական միացյալ ուժերի դեմ։ Նոյեմբերի 21-ին Նժդեհն ազատագրեց Գորիսը, իսկ մեկ ամիս անց՝ 1920 թ. դեկտեմբերի 25-ին, Տաթևի վանքում հրավիրված համազանգեզուրյան առաջին համագումարում որոշում ընդունվեց Զանգեզուրը ժամանակավորապես հռչակել անկախ պետություն՝ Ինքնավար Սյունիք անվանումով, մինչև պարզ կդառնար Հայաստանի Հանրապետությանը միանալու հնարավորությունը»։