Կիրակի, 15 նոյեմբերի, 2026 թ.
|
Ստեփանակերտում`   +14 °C

ԱԳ նախարարները կարևորել են հայ ռազմագերիների հայրենադարձման, տեղահանված արցախահայության իրավունքների և անվտանգությանն առնչվող հարցեր

ԱԳ նախարարները կարևորել են հայ ռազմագերիների հայրենադարձման, տեղահանված արցախահայության իրավունքների և անվտանգությանն առնչվող հարցեր
245
Երեքշաբթի, 07 սեպտեմբերի, 2021 թ., 17:00

Երևանում սեպտեմբերի 7-ին հանդիպել են Հայաստանի Հանրապետության արտաքին գործերի նախարար Արարատ Միրզոյանն ու Արցախի Հանրապետության արտաքին գործերի նախարար Դավիթ Բաբայանը:

ԱԳ նախարարները գոհունակություն են հայտնել Հայաստանի և Արցախի արտաքին քաղաքական գերատեսչությունների միջև հաստատված համագործակցության բարձր մակարդակի կապակցությամբ և հանգամանալից քննարկել քաղաքական երկխոսության հետագա խորացման և արտաքին քաղաքական օրակարգի առանցքային հարցերի շուրջ դիրքորոշումների համադրման ուղղությամբ ձեռնարկվող քայլերը։

Զրուցակիցները մտքեր են փոխանակել ադրբեջանաթուրքական ագրեսիայից հետո Արցախում ստեղծված իրավիճակի և հումանիտար խնդիրների հասցեագրման ուղղությամբ տեղում իրականացվող աշխատանքների շուրջ։ Այս համատեքստում ԱԳ նախարարներն առանձնահատուկ կարևորել են հայ ռազմագերիների և քաղաքացիական անձանց շուտափույթ և առանց նախապայմանների հայրենադարձումը, ինչպես նաև Արցախի ժողովրդի, հատկապես՝ տեղահանված արցախահայության իրավունքների վերականգնման և նրանց համապարփակ անվտանգության ապահովման համար անհրաժեշտ պայմանների ստեղծումը։

Անդրադառնալով Լեռնային Ղարաբաղի հիմնախնդրին՝ Հայաստանի և Արցախի ԱԳՆ ղեկավարներն ընդգծել են ԵԱՀԿ Մինսկի խմբի համանախագահության շրջանակներում ղարաբաղյան հակամարտության խաղաղ կարգավորման գործընթացի վերսկսման և համապարփակ ու տևական հանգուցալուծման անհրաժեշտությունը։

Արարատ Միրզոյանը և Դավիթ Բաբայանը ևս մեկ անգամ շեշտել են Հայաստանի ինքնիշխան տարածքի նկատմամբ և Արցախի Պաշտպանության բանակի հետ շփման գծում ադրբեջանական զինված ուժերի կողմից իրականացվող սադրիչ գործողությունների անթույլատրելիությունը, ինչը խաթարում է տարածաշրջանային անվտանգությանն ու կայունությանն ուղղված ջանքերը։