Թուրքիայի խորհրդարանում վաղը կկայանա ՆԱՏՕ-ին Ֆինլանդիայի անդամակցության հարցի քվեարկությունը

Չորեքշաբթի օրը Bloomberg-ը հայտնել է, որ հինգշաբթի օրը՝ մարտի 30-ին, Թուրքիայի խորհրդարանը քվեարկելու է Հյուսիսատլանտյան դաշինքին միանալու Ֆինլանդիայի դիմումի հարցը։
Ավելի վաղ Հունգարիայի խորհրդարանը վավերացրել էր Ֆինլանդիայի անդամակցությունը ՆԱՏՕ-ին, իսկ Թուրքիան մնացել է դաշինքի միակ անդամ երկիրը, որը դեռ չի հաստատել Հելսինկիի հայտը։

ՆԱՏՕ-ին Ֆինլանդիայի և Շվեդիայի միանալու մասին արձանագրություններն ստորագրվել են ռազմական բլոկի անդամ երկրների կողմից 2022 թվականի հուլիսի 5-ին։ Բայց այդ երկրները դաշինքին կարող են միանալ միայն այն դեպքում, երբ միաձայն հավանություն ստանան։
Թուրքիան արգելափակել է նրանց մուտքի գործընթացը և պահանջել է նախ արտահանձնել քրդական կազմակերպությունների ղեկավարներին, որոնց Անկարան համարում է ահաբեկչական, ինչպես նաև հանել երկիր զենք մատակարարելու արգելքը։

Մարտին Անկարան հայտարարեց, որ իրենք պատրաստ են վավերացնել Ֆինլանդիայի թեկնածությունը մինչև երկրում մայիսին կայանալիք նախագահական ընտրությունները, սակայն Շվեդիայի դեմ առարկությունը մնում է։