«Քանի որ Հռոմի ստատուտի «արժեքը» սրընթաց կերպով աճում է, ապա ընդլայնվում է նաև սակարկվող խնդիրների քանակը». Հեքիմյան

Պահպանողական կուսակցության նախագահ Կարեն Հեքիմյանի գրառումը. «Երբ ՀՀ Սահմանադրական դատարանը ՀՀ Սահմանադրությանը համապատասխանող ճանաչեց Հաագայի Միջազգային քրեական դատարանի՝ Հռոմի կանոնադրությունում ամրագրված պարտավորությունները, մեր պետության քաղաքական «դաշնակիցները» և վերջիններիս դաշնակիցներն իրար խառնվեցին: Պեսկով Դմիտրին, Զատուլին Կոնստանտինը, Լավրով Սերգեյը, Զախարովա Մարիան միմյանց հերթ չտալով սկսեցին խոսել Հայաստանի՝ Հռոմի ստատուտի հնարավոր վավերացման մասին: Դրան զուգահեռ մեր «դաշնակիցների» դաշնակիցներն Արցախում և Սյունիքում նոր տարածքներ, ճանապարհներ և բարձունքներ են գրավում: Այսինքն, աստիճանաբար ուրվագծվում է Հռոմի ստատուտի իրական արժեքը:
Քաղաքական առումով, Հայաստանի համար լավ պայմաններ են ստեղծվել Հռոմի ստատւտի «սակարկման» համար: Ընդ որում, քանի որ այսօրվա իրականության մեջ Հռոմի ստատուտի «արժեքը» սրընթաց կերպով աճում է, ապա ընդլայնվում է նաև սակարկվող խնդիրների քանակը:
Եվ, ըստ այդմ, սակարկելով Հռոմի ստատուտին միանալու կամ չմիանալու հանգամանքը, Հայաստանը կարող է միջազգային ասպարեզում բազմաթիվ ազգային խնդիրներ լուծել:
Իրավիճակը պարզ է, սակայն արդյո՞ք օրվա իշխանությունն ընդունակ է որևէ ազգային խնդիր լուծել»: