Կոլումբիայում ձերբակալել են նախագահի որդուն

Կոլումբիայի գլխավոր դատախազությունը կալանավորել է նախագահ Գուստավո Պետրոյի ավագ որդուն և նրա նախկին կնոջը՝ փողերի լվացման և ապօրինի հարստացման գործով։ Այս մասին իր X-ում հայտնել է ինքը՝ Պետրոն։
«Դատախազությունը կալանավորել է իմ որդուն՝ Նիկոլասին և նրա նախկին կնոջը՝ Դեյսին, որպես մարդ և հայր, ինձ ցավ է պատճառում հետևելը նման ինքնաոչնչացմանը և նրան, թե ինչպես է իմ որդիներից մեկը բանտ նստում։

Որպես երկրի նախագահ՝ ես դատախազությանը տալիս եմ իմ կողմից օրենքով սահմանված բոլոր անհրաժեշտ երաշխիքները»,- գրել է նա։ Պետրոն նաև խոստացել է «չմիջամտել ու ճնշում չգործադրել» դատական ​​համակարգի վրա։

Գլխավոր դատախազությունը հայտնել է, որ Նիկոլա Պետրո Բուրգոսը կալանավորվել է «փողերի լվացման և ապօրինի հարստացման» կասկածանքով, իսկ նրա նախկին կինը՝ Դեյսուրիս Վասկեսը «փողերի լվացման և անձնական տվյալների անօրինական հասանելիության» կասկածանքով։

Նախագահի որդու նկատմամբ հետաքննությունը սկսվել է Վասկեսի՝ Semana ամսագրին տված հարցազրույցից հետո, որտեղ նա ասել է, որ իր նախկին ամուսինն, իբր, փող է ստացել թմրավաճառներից հոր նախընտրական քարոզարշավի համար։

Երկրի ղեկավարի որդին, ըստ գլխավոր դատախազության, միջոցներն իր համար է պահել։ Հարցազրույցի հրապարակումից հետո նախագահը խնդրել է վերահսկողական գործակալությանը հետաքննություն սկսել իր որդու նկատմամբ: