«3 տարի մոնիտորինգ չի արվել, թե ազդող նյութի ինչ ավելցուկներ կան մշակաբույսերում»․ Պիպոյան

«2021 թվականից այսկողմ մոնիթորինգ չի արվել, թե օրինակ՝ պեսցիդիտների ինչ չափաքանակ կա մեր մշակաբույսերում»,-«Սպուտնիկ Արմենիա» մամուլի կենտրոնում տված ասուլիսի ժամանակ ասել է «Իրազեկ և պաշտպանված սպառող» ՀԿ–ի նախագահ Բաբկեն Պիպոյանը՝ անդրադառնալով դեպի ՌԴ հայկական պտուղ-բանջարեղենի մի մասի արտահանման սահմանափակումներին։
Հիշեցնենք, որ ՀՀ ՍԱՏՄ-ն Ռոսսելխոզնադզորից նամակ էր ստացել, որ Հայաստանից Ռուսաստան արտահանվող պտուղ-բանջարեղենի ապրիլ-հունիս ամիսների խմբաքանակներում արձանագրել են խախտումներ և հուլիսի 15-ից ՌԴ տարածք հայաստանյան 16 ընկերությունների արտադրանքի մատակարարումը ժամանակավորապես սահմանափակվել է։ ՍԱՏՄ-ն ևս հարցի առնչությամբ հայտարարություն էր տարածել։

Բաբկեն Պիպոյանը ՍԱՏՄ հայտարարությունն անթույլատրելի է համարել, քանի որ այնտեղ որևէ պարզաբանում չկա, որն ուղղված կլիներ հայ սպառողին։

«Ռուսական կողմից սև ցուցակում հայտնված հայ տնտեսվարողը որևէ գրություն ՍԱՏՄ-ից չի ստացել, թե կոնկրետ ինչ խախտում է արել ու ինչը պետք է վերացնի։ Հայտարարության մեջ ընդամենը նշված է, որ գործադրվում են բոլոր ջանքերը իրավիճակն արագ կարգավորելու համար։ Մինչդեռ իրական տվյալներ ու մոնիտորինգի արդյունքներ մինչ օրս հանրությանը չեն ներկայացվել»,-ասել է նա։
Պիպոյանը ներկայացրել է նաև նախորդ տարիներին արված մոնիտորինգի արդյունքների վերաբերյալ տվյալներ՝ նշելով, թե ինչպիսի խախտումներ է հայտնաբերել ՍԱՏՄ–ն մեր տեղական մշակաբույսերում։ Մասնավորապես 2019 թ. 13 պտուղ–բանջարեղենում լիազոր մարմինը թույլատրելի սահմանայի չափաքանակը գերազանցող 10 ազդող նյութ է հայտնաբերել։ Ամենից շատ շեղումը հայտնաբերվել է խաղողի դեպքում։ 2021 թվականին 34 ազդող նյութի ավելցուկ է հայտնաբերվել 14 մշակաբույսում։