«Տպավորություն է, որ Սեժուրնեն առաջնորդվում է հայկական լսարանի, մեղմ ասած, միամտության կանխավարկածով»․ Հակոբ Բադալյան

Քաղաքական մեկնաբան Հակոբ Բադալյանի գրառումը․ «Երբ Ֆրանսիայի արտգործնախարարը Երևանում հայտարարում է, որ Փարիզը կպաշտպանի Հայաստանի ժողովրդավարությունը Ռուսաստանից, ժպիտով հիշում եմ, թե Փարիզն ինչպես էր պաշտպանում Նոր Կալեդոնիան «Ադրբեջանի հրահրած ապստամբությունից»:
Նոր Կալեդոնիան, որը Ֆրանսիային ենթակա տարածք է, բռնկվեց ապստամբությամբ, որի հետևում Ֆրանսիան պաշտոնապես արձանագրեց Ադրբեջանին: Համենայն դեպս, այդպիսի հայտարարություն արեց Ֆրանսիայի ներքին գործերի նախարարությունը:
Փաստորեն, Ադրբեջանի հրահրած ապստամբությունը Նոր Կալեդոնիայում Ֆրանսիան կարողացավ զսպել միայն բանակի միջամտությամբ:
Եվ հիմա, երբ Ֆրանսիայի արտգործնախարարը խոսում է Հայաստանի ժողովրդավարությունը Ռուսաստանի «սպառնալիքներից ու թշնամանքից» պաշտպանելու մասին, տպավորություն է, որ հարգարժան Ստեփան Սեժուրնեն առաջնորդվում է հայկական լսարանի... մեղմ ասած միամտության կանխավարկածով:
Մյուս կողմից, Ֆրանսիայի ԱԳ նախարարի այդ հայտարարությունները թերևս պետք է ընկալել ժպիտով, որովհետև Սեժուրնեն այդ հայտարարություններով հենց իրապես էլ խաղում է այսպես ասած դահլիճի վրա, մինչդեռ նրա այցի իրական քաղաքական բովանդակությունն ու խորքը թերեւս բոլորովին այլ են:
Ու այդտեղ արժե թերևս նկատել մի «այլ» հանգամանք՝ Ֆրանսիայի արտգործնախարարը Հայաստան է ժամանում սեպտեմբերի 15-16-ին, իսկ սեպտեմբերի 15-ին Հայաստանում վարչապետի ընտանիքին պատկանող պարբերականով ազդարարվում է, որ Նիկոլ Փաշինյանը 16-ին պաշտոնական այց է կատարում Վրաստան:
Այն Վրաստան, որի կառավարող ուժի առաջնորդ Բիձինա Իվանիշվիլին երկու օր առաջ հայտարարել էր, որ Վրաստանը կունենա օսերից 2008 թվականի պատերազմի համար ներողություն խնդրելու քաջություն, որպեսզի վերականգնի երկու եղբայր ժողովրդի հարաբերությունը:
Ու զարմանալի զուգադիպությամբ էլ Նիկոլ Փաշինյանը Վրաստան այցի օրը որոշումը ֆեյսբուքյան «լուսաբացը» դիմավորել «իրական Հայաստանից» կտրված լինելու համար հայ ժողովրդից «իր բաժին ներողությունը» խնդրելով»։