«Քաղաքականությունը դաժան բան է». Թրամփը հանդիպել է Բայդենի հետ

ԱՄՆ-ի նախագահական ընտրություններում հաղթած Դոնալդ Թրամփն Սպիտակ տանը հանդիպել է գործող նախագահ Ջո Բայդենի հետ։

Հանդիպման ընթացքում Բայդենը Թրամփին ասել է, որ մտադիր է իշխանությունը խաղաղ ճանապարհով փոխանցել հաջորդ նախագահին, իսկ Թրամփն ասել է, որ գործընթացը կանցնի «հնարավորինս սահուն»:

«Պարոն ընտրված և նախկին նախագահ Դոնալդ, շնորհավորում եմ: Մենք ցանկանում ենք ապահովել իշխանության սահուն անցում և կանենք ամեն ինչ, որպեսզի համոզվենք, որ դուք ունեք այն ամենը, ինչ ձեզ անհրաժեշտ է,- ասել է Բայդենը Թրամփին։- Այսօր մենք կարող ենք քննարկել այդ հարցերից մի քանիսը: Բարի գալուստ և բարի վերադարձ»:

«Քաղաքականությունը դաժան բան է, իսկ աշխարհն ընդհանրապես հաճախ այնքան էլ հաճելի վայր չէ։ Բայց այսօր նա հաճելի է, և ես իսկապես գնահատում եմ դա»,- ասել է Թրամփը, որից հետո երկու քաղաքական գործիչները սեղմել են ձեռքերը։

Թրամփն ու Բայդենը նախընտրական քարոզարշավի ընթացքում կոշտ քննադատում էին միմյանց և վերջին անգամ հանդիպել էին հունիսին տեղի ունեցած բանավեճի ժամանակ։ Բայդենը կարճ ժամանակ անց դուրս մնաց ընտրապայքարից՝ իր տարիքի և նախագահի պաշտոնը զբաղեցնելու հնարավորության հետ կապված մտահոգությունների պատճառով:
Ընտրված նախագահի հանդիպումը հեռացողի հետ ամերիկյան քաղաքական կյանքի վաղեմի ավանդույթ է։

Սակայն 2020 թվականի նախագահական ընտրություններից հետո, որոնք Թրամփը պարտվեց, բայց հրաժարվեց ընդունել իր պարտությունը, Բայդենի հետ հանդիպումը չկայացավ. այն ժամանակվա նախագահը հրաժարվեց նրան հրավիրել։

Մեկնաբանելով այսօրվա հանդիպումը՝ Սպիտակ տան խոսնակ Կարին Ժան Պիերն ասել է, որ Բայդենը «հավատարիմ է նորմերին, հավատարիմ է մեր ինստիտուտներին, նա հավատում է իշխանության խաղաղ փոխանցմանը»:

Թրամփը 2024 թվականի նախագահական ընտրություններում հաղթելուց հետո առաջին անգամ է եկել Վաշինգթոն։ Սպիտակ տուն այցից առաջ նա այցելել է Ներկայացուցիչների պալատ, որտեղ հանդիպել է Հանրապետական ​​կուսակցության անդամների հետ: