«Երևանն այս տեմպերով ընդլայնմանը պատրաստ չէ»․ Մանուկ Սուքիասյան

«Անցնող մեկ տարին ցույց տվեց՝ որքան զսպող բարձր տեղական տուրքեր են սահմանվում, այդքան այդ շինարարությունը դառնում է անզուսպ։ Փորձը ցույց տվեց, որ տեղական բարձր տուրքերը զսպող չեն, քաղաքում շարունակվում է խելահեղ կառուցապատումը, ուղղակի քաղաքապետարանը ունենում է ֆինանսական մուտքեր»,- Երևանի ավագանու նիստի ժամանակ ասաց «Մայր Հայաստան» խմբակցության անդամ Մանուկ Սուքիասյանը՝ կառուցապատման ոլորտում տեղական տուրքերի դրույքաչափերի սահմանման վերաբերյալ հարցի քննարկման ժամանակ, որոնք, ըստ քաղաքապետ Ավինյանի, կառուցապատման ծավալները զսպող միջոց են։ «Խնդիրը միայն տեղական տուրքերով կառուցապատումը զսպելու մեջ չէ, ամենակարևորն այն է, որ քաղաքը չեն կառուցապատում, հետո գլխավոր հատակագիծը համապատասխանեցնում եղած վիճակին։ Այն ենթակառուցվածքների կոլապսները, որ ապրում ենք, ցույց է տալիս, որ քաղաքը այս տեմպերով ընդլայնմանը ուղղակի պատրաստ չէ՝ փողոցների թողունակություն, ջրամատակարարում, ջրահեռացում էներգամատակարարում, տրանսպորտ։ Բնապահպանական այս վատթարագույն վիճակը ևս պայմանավորված է խելահեղ կառուցապատմամբ»,- ասաց Սուքիասյանը՝ դեմ արտահայտվելով տուրքերի դրույքաչափերի բարձրացմանը։