«Ընդդիմությունը էսկալացիայի հնարավորություն չունի». Կոբախիձե

Ընդդիմությունը չունի ժողովրդի աջակցությունը, նա ստիպված կլինի ընդունել Վրաստանում հոկտեմբերի վերջին տեղի ունեցած խորհրդարանական ընտրությունների արդյունքները։ Այս մասին «Imedi»-ին տված հարցազրույցում հայտարարել է վարչապետ Իրակլի Կոբախիձեն։

«Ընդդիմությունը չունի ժողովրդի աջակցությունը, պարզ է, որ այս օրերին Ռուսթավելի պողոտայում միջինը մինչև հազար մարդ է հավաքվում, հետևաբար, նրանք չունեն որևէ բանի հասնելու ռեսուրս և, ի վերջո, պետք է ճանաչեն ընտրությունները»,- ասել է Կոբախիձեն։
Նա հավելել է, որ «Միասնություն-Ազգային շարժում», «Լելոն Վրաստանի համար» և «Գախարիան հանուն Վրաստանի» քաղաքական կուսակցությունները չեն հրաժարվել պետական ֆինանսավորումից, ինչի իրավունքն ունեն խորհրդարանական ընտրությունների արդյունքներով։ «Այսպիսով այդ կուսակցությունները ճանաչեցին ընտրությունների արդյունքները»,- նշել է վարչապետը։

Հիշեցնենք, որ նոյեմբերի 28-ին Վրաստանի խորհրդարանի պատգամավորները կողմ էին քվեարկել նոր կառավարության կազմին՝ վարչապետ Կոբախիձեի գլխավորությամբ։ Ընտրությունների արդյունքները ընդդիմությունը չի ճանաչել։