Մադրիդի «Ռեալը» կփոխի տնային մարզադաշտի անունը

Մադրիդյան «Ռեալ Մադրիդ» ֆուտբոլային ակումբի ղեկավարությունը որոշել է փոխել իր տնային մարզադաշտի՝ «Սանտիագո Բեռնաբեու»-ի անունն ու դարձնել պարզապես «Բեռնաբեու»: Ըստ լրատվամիջոցների՝ փոփոխությունը պայմանավորված է կոմերցիոն պատճառներով։
Ինչպես նշում է Marca-ն, Մադրիդի «Ռեալի» ղեկավարությունը դեռևս պաշտոնական հայտարարություններ չի արել, սակայն մարզադաշտի անվանման փոփոխություններն արդեն իսկ արտացոլվել են որոշակի մարքեթինգային և մերչենդայզինգային արշավներում։ Նոր անունը հայտնվել է մարզադաշտի պաշտոնական կայքում, սոցիալական մեդիայի պրոֆիլում և նվերների վրա, որոնք ակումբը նվիրել է սուրբծննդյան հանդիպումներին: Բացի այդ, մարզադաշտով շրջագայությունն այժմ կոչվում է «Բեռնաբեու տուր»:

Աղբյուրի փոխանցմամբ՝ մարզադաշտի անվանումը փոխվել է կոմերցիոն նպատակներով։

«Սանտիագո Բեռնաբեուն» բացվել է 1947 թվականին, իսկ մարզադաշտի պաշտոնական անվանումը եղել է «Ռեալ Մադրիդ» ֆուտբոլային ակումբի մարզադաշտ։ 1955 թվականին մարզադաշտը վերանվանվել է ի պատիվ իսպանացի ֆուտբոլիստ և ակումբի նախագահ Սանտյագո Բեռնաբեուի, որի օրոք ակումբը շահել է վեց եվրոպական գավաթ (այժմ՝ ՈՒԵՖԱ-ի Չեմպիոնների լիգա) և բազմաթիվ ներքին գավաթներ։ Մարզադաշտը կարող է ընդունել ավելի քան 81000 հանդիսական։ Այն ընդունել է 1964 թվականի Եվրոպայի ֆուտբոլի առաջնության և 1982 թվականի աշխարհի առաջնության եզրափակիչները։ Ընդունել է Չեմպիոնների լիգայի եզրափակիչը չորս անգամ՝ 1957, 1969, 1980 և 2010 թվականներին: 2019 թվականին սկսվել է մարզադաշտի լայնածավալ վերակառուցումը, աշխատանքները պետք է ավարտվեին 2023 թվականին, սակայն ժամկետը երկարաձգվել է: