Զելենսկին կոչ է արել դաշնակիցներին` կատարել իրենց խոստումները

Ուկրաինայի նախագահ Վլադիմիր Զելենսկին կոչ է արել դաշնակիցներին՝ կատարել զենքի մատակարարման վերաբերյալ իրենց տված բոլոր խոստումները, այդ թվում՝ հակազդելու ռուսական օդային հարվածներին, հայտնում է Reuters-ը։

Զելենսկին ասել է, որ վերջին շաբաթվա ընթացքում ռուսական զորքերը հարյուրավոր հարվածներ են հասցրել Ուկրաինային՝ օգտագործելով մոտ 700 ավիառումբ և ավելի քան 600 հարվածային անօդաչու թռչող սարք։ «Ամեն շաբաթ ռուսական պատերազմը շարունակվում է միայն այն պատճառով, որ ռուսական բանակը պահպանում է Ուկրաինային ահաբեկելու և երկնքում նրա գերազանցությունն օգտագործելու կարողությունը»,- գրել է Զելենսկին Telegram-ի իր ալիքում։

Նա Ուկրաինայի դաշնակիցներին կոչ է արել իրականացնել արդեն ձեռք բերված պայմանավորվածությունները։ «Վաշինգթոնում ՆԱՏՕ-ի գագաթնաժողովում, ինչպես նաև Ռամշտեյնում կայացած հանդիպումներում Ուկրաինայի հակաօդային պաշտպանության վերաբերյալ ընդունված որոշումները դեռևս ամբողջությամբ չեն իրականացվել»,- ասել է Զելենսկին։

Ավելի վաղ Ուկրաինայի ղեկավարն ասել էր, որ գործընկերների և Միացյալ Նահանգների հետ քննարկել է Ուկրաինային հակաօդային պաշտպանության համակարգեր և հրթիռներ արտադրելու լիցենզիաներ տրամադրելու հնարավորությունը։