«Պահանջում ենք պատասխան քայլեր՝ ադրբեջանական դիվանագիտության դեմ»․ ԵԽ պատգամավոր

Հայաստանը կանգնած է բարդ ու լուրջ մարտահրավերների առջև, որոնք վտանգում են նրա անվտանգությունը, ինքնիշխանությունն ու ժողովրդավարական արժեքները։

Այս պայմաններում Եվրոպան պարտավոր է գործել՝ աջակցելով Հայաստանի ժողովրդին այս կարևոր պահին՝ ամրապնդելով նրա կապերը Եվրոպայի հետ և պաշտպանելով նրա իրավունքներն ու անվտանգությունը։

Այս մասին «Արմենպրես»-ին ասել է Եվրոպական խորհրդարանի ֆրանսիացի պատգամավոր Ֆրանսուա Գզավիյե Բելյամին։

«Ցավոք, Եվրոպական հանձնաժողովը երկար ժամանակ է, ինչ չի ցանկանում անհրաժեշտ վճռականությամբ արձագանքել Ադրբեջանի վարքագծին։ Մենք պահանջում ենք արագ և պարզ պատասխան քայլեր, հատկապես Ադրբեջանի դիվանագիտության նկատմամբ»,- ասել է ֆրանսիացի պատգամավորը՝ ի պատասխան հարցին, թե ինչո՞ւ ԵՄ-ն ի զորու չէ անգամ Ադրբեջանի կողմից իրեն հասցեագրված սպառնալիքներին ըստ արժանվույն պատասխանել։