«Գլխավոր հրամանատար ես եղել, պետք է բանակի պուլսը զգայիր»․ Մովսես Հակոբյան

«Բանակով զբաղվում են այն մարդիկ, ովքեր դրա իրավունքը չունեն՝ քաղաքական գործիչներ, պատգամավորներ»,- «24Նյուզ»,-ի հետ զրույցում այս մասին նշեց ՀՀ ԶՈՒ ԳՇ նախկին պետ, Արցախի ՊԲ նախկին հրամանատար, գեներալ-գնդապետ Մովսես Հակոբյանը։

«Բանակը քաղաքականությունից դուրս կառույց է, և հիմա մարդիկ չեն ուզում գնալ այնտեղ, քանի որ չեն ուզում ընկնել հարվածներրի տակ, այսօր բոլոր հարուցված գործերը, որոնք վերաբերում են մարտական գործողությունների ժամանակ կայացրած որոշումներին, անօրինական են և հակաիրավական․ իրավունք չունեն դատելու՝ հրամանատարի կայացրած որոշումը ճիշտ է եղել, թե ոչ․ այդ որոշումները քննարկման ենթակա չեն։ Մարտը դինամիկ երևույթ է, անընդհատ փոփոխական է, որևէ մեկը չի կարող ասել՝ ինչ իրավիճակում է հրամանատարն այդ որոշումը կայացրել։

Տիրան Վազգենիչին դատում են այն գործողության համար, ինչի համար տվել են ազգային հերոսի կոչում․․․ Գլխավոր հրամանատար ես եղել, պետք է բանակի պուլսը զգայիր․․․ Տիրան Վազգենիչին դատելն անհնարին է, անօրինական, չի թույլատրվում։ Նույնը Միքայել Արզումանյանին է վերաբերում, ուղղակի նա մի քիչ չարաճճի գեներալ է, չի ենթարկվում, դրա համար «նստեցրած» պահում են, թե չէ վաղուց բաց կթողնեին»,- ասաց Հակոբյանը։