«Լուրջ խնդիրներից է պետության կողմից հովանավորվող պատմության դասագրքերում ատելության խոսքի ներառումը». Սոնա Ղազարյանը` ԵԽԽՎ-ում
![]() 2212 Չորեքշաբթի, 29 հունվարի, 2025 թ., 22:31 Ստրասբուրգում ընթացող Եվրոպայի խորհրդի խորհրդարանական վեհաժողովի (ԵԽԽՎ) տարեկան նստաշրջանի առաջին մասի աշխատանքներին մասնակցում է ԵԽԽՎ-ում ԱԺ պատվիրակությունը՝ պատվիրակության ղեկավար Ռուբեն Ռուբինյանի գլխավորությամբ: Նստաշրջանում զեկույցով հանդես է եկել ՀՀ ԱԺ պատվիրակության անդամ Սոնա Ղազարյանը: «Հարգելի' տիկին Լուզ, Շնորհակալություն կարեւոր զեկույցի համար: Կցանկանայի շնորհակալություն հայտնել Եվրոպայում պատմության ուսուցման դիտակետային կենտրոնի 4-րդ ամենամյա համաժողովի կազմակերպման համար եւ վերահաստատել Հայաստանի աջակցությունը Դիտակետի առաքելությանը: Եվրոպայում եւ իր սահմաններից անդին ճգնաժամային ժամանակներ են՝ մարտահրավերներ, որոնք հիշեցնում են պատմության մութ շրջանները: Երկրորդ համաշխարհային պատերազմից հետո խաղաղության եւ կայունության խթանման նպատակով ձեւավորված աշխարհակարգը եւ միջազգային կառույցները լուրջ ճնշման տակ են, քանի որ պատերազմը վերադարձել է Եվրոպա եւ դրա սահմաններից դուրս՝ խարխլելով անվտանգության եւ համագործակցության հիմքերը: Մենք ականատես ենք լինում ուժի կիրառման անհանգստացնող նորմալիզացմանը, ժողովրդավարական հաստատությունների հետընթացին, ծայրահեղ ազգայնականության եւ պոպուլիզմի աճին՝ զարգացումներ, որոնք սպառնում են մեր ընդհանուր արժեքներին, որոնք պաշտպանում են խաղաղությունը մեր հասարակություններում: Այս ճգնաժամին ավելանում են ատելության խոսքի եւ ապատեղեկատվության տարածումը, որոնք հաճախ խթանվում են պատմության շահարկմամբ՝ քաղաքական նպատակների համար: Հայաստանը խորապես գիտակցում է այս մարտահրավերները: Մեր անվտանգության մտահոգություններից բացի, մենք ամեն օր բախվում ենք մեր պատմության եւ մշակութային ինքնության խեղաթյուրման փորձերին: Պատմության շահագործումն ապակառուցողական օրակարգեր առաջ մղելու համար սպառնալիք է այն խաղաղ համակեցությանը, որին բոլորս ձգտում ենք: Անթույլատրելի է ժխտել պատմական իրողությունները կամ կեղծել պատմությունը՝ հարեւան երկրների դեմ տարածքային հավակնություններն արդարացնելու նպատակով: Պատմությունը պետք է ծառայի որպես ճշմարտության եւ փոխըմբռնման հիմք՝ հարթելով հաշտեցման ճանապարհը, այլ ոչ թե որպես գործիք՝ բաժանարար եւ մոլորեցնող օրակարգեր առաջ տանելու համար: Մեկ այլ լուրջ խնդիր, որի մասին ցանկանում եմ խոսել, պետության կողմից հովանավորվող պատմության դասագրքերում ատելության խոսքի ներառումն է, որը խթանում է ագրեսիան, անհանդուրժողականությունն ու ռասիզմը: Երբ կրթական ռեսուրսները շահագործվում են կանխակալ պատմություններ ձեւավորելու համար, դրանք խարխլում են խաղաղությունը եւ ամրապնդում վնասակար կարծրատիպերը: Կենսականորեն կարեւոր է, որ մենք դիմագրավենք այս վտանգավոր միտումը՝ խթանելով ճշգրիտ, հավասարակշռված պատմության ուսուցանումը, որն աջակցում է բազմազանությունը եւ մերժում ատելության ու խտրականության բոլոր ձեւերը՝ կանխելով էթնիկ զտումները, ատելությամբ դրդված հակամարտությունները եւ մարդկության դեմ ուղղված հանցագործությունները: Այս մարտահրավերների բացահայտումն ընդամենը սկիզբն է. մեր պատասխանատվությունն այժմ միասին լուծումներ գտնելն է: Խաղաղության մշակույթ կառուցելը սկսվում է նորարարական, քաղաքացիակենտրոն կրթությամբ, որը երիտասարդներին հնարավորություն է տալիս քննադատաբար մոտենալ պատմությանը, այլ ոչ թե անխոս ընդունել այն: Սա պահանջում է շարունակական ջանքեր եւ համագործակցություն՝ կրթական համակարգեր մշակելու համար, որոնք ամրապնդում են ժողովրդավարությունը եւ «Միասին ապրելու» գաղափարը: Հայաստանը հավատարիմ է այս առաքելությանը եւ աջակցում է այն նախաձեռնություններին, որոնք պատմական ճշմարտությունը բերում են առաջնագիծ»,- նշել է պատգամավորը: |
Նիկոլ Փաշինյանը հոկտեմբերի 13-ին կմեկնի Եգիպտոս
185Երեկ, 19:24ՀՀ ԱԳՆ-ի ցավակցությունը կատարցի դիվանագետների մահվան կապակցությամբ
291Երեկ, 18:42Նոր նշանակում՝ ՊՆ-ում
25910.10.2025, 22:06Հատուկ բանակային կորպուսի շտաբի պետն ազատվել է պաշտոնից
24610.10.2025, 22:00Նիկոլ Փաշինյանն աշխատանքային այցով ժամանել է Տաջիկստան
25410.10.2025, 01:00Լիտվան բողոքի նոտա է հղել ՌԴ-ին
29509.10.2025, 20:08Գարեգին Երկրորդն ընդունել է Արցախի պետական այրերին
33108.10.2025, 16:42Նիկոլ Փաշինյանը կմեկնի Բրյուսել (տեսանյութ)
21708.10.2025, 15:48