Վրաստանում բողոքի ցույցերը գիշերը շարունակվել են

Վրաստանում «Թբիլիսի մոլ»-ի և Թբիլիսիի քաղաքային դատարանի մոտ սկսված բողոքի երթը շարունակվել է գիշերը՝ հասնելով Վրաստանի խորհրդարան։

Երթի մասնակիցները քայլել են մոտ14 կմ։ Այդ ընթացքում ձերբակալությունները շարունակվել են, հայտնում են վրացական լրատվամիջոցները:

Նախնական տվյալներով՝ կիրակի տեղի ունեցած ցույցերի ժամանակ բերման է ենթարկվել 34 մարդ։ Ներքին գործերի նախարարությունը դեռևս որևէ մեկնաբանություն չի տվել։ Առնվազն հինգ մարդ վնասվածքներով տեղափոխվել է հիվանդանոց։

Հանրային պաշտպանը Հատուկ քննչական ծառայությունից պահանջել է հետաքննել ոստիկանության կողմից ուժի կիրառման բոլոր դեպքերը։ Օմբուդսմենի հայտարարությունից հետո էլ քննչական ծառայությունը ոչ մի մեղադրանք չի առաջադրել ոստիկանությանը։