«Պուտին-Թրամփ հանդիպման նախապատրաստական ​​աշխատանքները շարունակվում են»․ Ուշակով

ՌԴ և ԱՄՆ նախագահներ Վլադիմիր Պուտինի և Դոնալդ Թրամփի հանդիպումը կկազմակերպվի հենց որ անհրաժեշտություն լինի։ Այս մասին, ռուսական «Կոմերսանտի» փոխանցմամբ, հայտնել է ՌԴ նախագահի օգնական Յուրի Ուշակովը։ Նա պարզաբանել է, որ ռուսական կողմը պատրաստվում է հանդիպմանը, և թեման քննարկվում է Վաշինգթոնի հետ։
«Մենք պատրաստվում ենք հանդիպմանը, և այն կկազմակերպվի հենց որ դրա անհրաժեշտությունը առաջանա»,- ասել է Ուշակովը։

Նրա խոսքով, ներկայումս երկու երկրների միջև շփումները տեղի են ունենում «այլ մակարդակներով»։ «Հանդիպումը կամ հեռախոսազրույցը կարելի է բավականին արագ կազմակերպել, բայց ես դեռ որևէ կոնկրետ բան չեմ կարող ասել»,- հավելել է նա։

Մարտի 13-ի երեկոյան Մոսկվայում փակ բանակցություններ են տեղի ունեցել Վլադիմիր Պուտինի և ԱՄՆ նախագահի հատուկ բանագնաց Սթիվ Վիտկովի միջև։ ՌԴ նախագահի մամուլի քարտուղար Դմիտրի Պեսկովի խոսքով՝ Վլադիմիր Պուտինը պարոն Ուիթկովի միջոցով «տեղեկատվություն և լրացուցիչ ազդանշաններ է փոխանցել նախագահ Թրամփին»։ Թրամփը մարտի 13-ին կայացած հանդիպման արդյունքները գնահատել է որպես «շատ լավ և արդյունավետ»։

Դոնալդ Թրամփի հատուկ բանագնացին հանդիպելուց առաջ Պուտինն ասել է, որ Ռուսաստանը համաձայնել է դադարեցնել ռազմական գործողությունները Ուկրաինայում, բայց պայմանով, որ դա կբերի երկարաժամկետ խաղաղության։