Նախնական տվյալներով` Էրդողան-Թրամփ հանդիպումը կկայանա ապրիլի վերջին

Թուրքիայի նախագահ Ռեջեփ Էրդողանը հեռախոսազրուց է ունեցել ԱՄՆ-ի նախագահ Դոնալդ Թրամփի հետ: Հեռախոսազրուցի ընթացքում նախագահները երկկողմ հարաբերությունների հետ մեկտեղ քննարկել են նաև տարածաշրջանային ու գլոբալ հարցեր: Նշվում է, որ առաջիկայում նախատեսվում է երկու երկրների նախագահների հանդիպումը: Ըստ նախնական տվյալների՝ Էրդողան-Թրամփ հանդիպումը կկայանա ապրիլի վերջին Սպիտակ տանը:

Ինչպես հաղորդում է Bloomberg-ը, թուրքական կողմն արդեն աշխատում է հանդիպման կազմակերպման ուղղությամբ։ Էրդողանն Անկարայի և Վաշինգթոնի միջև ավելի ամուր գործընկերությունը կարևոր է համարում տարածաշրջանային կայունության համար, քանի որ Թուրքիան ձգտում է առաջատար միջնորդ դառնալ աշխարհաքաղաքական հարցերում՝ Ուկրաինայից մինչև Սիրիա:

Աղբյուրները նշել են, որ Թուրքիայի դերը՝ որպես ՆԱՏՕ-ի հիմնական անդամ, հատկապես կարևոր է, քանի որ Միացյալ Նահանգները վերագնահատում է Եվրոպայի հանդեպ իր պարտավորությունները: Թուրքիան ձգտում է համագործակցել Միացյալ Նահանգների հետ, և որ դա կարող է ներառել թուրքական զորքերի միացումը Ուկրաինայում ապագա խաղաղապահ առաքելությանը: