«Նորից դիմում գրեցինք, խոստացան լուծել խնդիրը»․ վթարային շենքի բնակիչներ

Ինչպես հայտնել էինք, Վարդաշենի վթարային շենքերի բնակիչներն առավոտից, իրենց բնակարաններով ապահովելու պահանջով, բողոքի ակցիա էին իրականացնում Երևանի քաղաքապետարանի, այնուհետև Կառավարության դիմաց։ Նրանց ընդունել է վարչապետի աշխատակազմի դիմումների քննարկման, քաղաքացիների հետ հետադարձ կապի մշտադիտարկման և գնահատման վարչության պետ Համլետ Նազարյանը։ «Նորից դիմում գրեցինք, որ տեսնենք՝ ինչ ժամկետներում են մեզ պատասխան տալիս։ Ասացին՝ հարցը քննարկվում է, մենք էլ նշեցինք, որ ավելի արագ լուծում տան, քանի որ շենքն ամեն պահ կարող է քանդվել։ Հայտնեցին, որ դիմումը կփոխանցեն կառավարությանը և առաջիկա նիստի ժամանակ հարցը կբարձրացվի։ Խոստացան կարճ ժամանակում լուծել խնդիրը»,- ասացին բնակիչները՝ նշելով, որ հակառակ դեպքում Կառավարության դիմաց նստացույց են սկսելու։