Վենսն անտեսել է Ուկրաինա այցելելու` Զելենսկու առաջարկը

Վլադիմիր Զելենսկին վերջերս կրկին հրավիրել է ԱՄՆ-ի փոխնախագահ Ջեյ Դի Վենսին՝ այցելել Ուկրաինա, սակայն հրավերն անպատասխան է մնացել:

Ամերիկյան Time ամսագրին տված Զելենսկու հարցազրույցի համաձայն՝ վերջինս իր հեռախոսազրույցներից մեկի ժամանակ Վենսին առաջարկել է վերանայել զինված հակամարտության ժամանակ Ուկրաինա չայցելելու իր որոշումը։ «Մենք դեռ սպասում ենք ձեզ»,- ասել է Զելենսկին։ Փոխնախագահը չի արձագանքել, գրում է աղբյուրը։

Սպիտակ տան Օվալաձև աշխատասենյակում Վենսի և ԱՄՆ-ի նախագահ Դոնալդ Թրամփի հետ սկանդալային հանդիպման ժամանակ Զելենսկին կոչ էր արել փոխնախագահին՝ այցելել Ուկրաինա, որպեսզի նա անձամբ տեսնի, թե ինչ է կատարվում երկրում։ Վենսն ասել էր, որ ուկրաինական իրադարձությունների մասին իմանում է «պատմություններից»: