«Ռուսների հետ կլինի երկու շատ բարդ հարց՝ ամբողջական զինադադար և տարածքների հարց». Զելենսկի

ԱՄՆ-ն ուկրաինական պատերազմի կարգավորման շուրջ բանակցությունների ընթացքում Ռուսաստանի հետ քննարկում է տարածքների հարցը։ Սակայն Կիևի հետ տարածքների վերաբերյալ պայմանավորվածություններ չկան։ Այս մասին լրագրողների հետ հանդիպման ժամանակ հայտարարել է Ուկրաինայի նախագահ Վլադիմիր Զելենսկին։

«Կարծում եմ, որ ամերիկյան կողմը ռուսների հետ խոսում է տարածքների մասին, մենք մտահոգված ենք, որ հենց ԱՄՆ-ն ազդեցություն ունենա Ռուսաստանի վրա, և ոչ թե հակառակը»,- ​​նշել է նախագահը։

Զելենսկու խոսքով՝ ԱՄՆ-ի նախագահ Դոնալդ Թրամփն ունի բավականաչափ ուժ, գործիքներ և պատժամիջոցներ՝ Ռուսաստանի նախագահ Վլադիմիր Պուտինի վրա ազդելու և պատերազմը դադարեցնելու համար։ Սակայն Կիևը մտահոգված է, որ ԱՄՆ-ն և Ռուսաստանը քննարկում են Ուկրաինայի մասին ինչ-որ բան՝ առանց Ուկրաինայի:

«Հասկանալի է, որ նրանք բարձրացնում են տարածքների հարցը: Եվ մեզ հետ տարածքների վերաբերյալ պայմանավորվածություններ չեն եղել: Նրանք գիտեն, որ դա ցավոտ հարց է»,- հավելել է Զելենսկին:

Ուկրաինայի նախագահն ընդգծել է, որ ուկրաինական տարածքների հարցը եղել և մնում է ամենաբարդներից մեկը ռուս-ուկրաինական պատերազմի ավարտի գործընթացում։

«Ես հենց սկզբից խոսել եմ այդ մասին: Կարծում եմ, որ ռուսների հետ կլինի երկու շատ բարդ հարց՝ ամբողջական զինադադար և տարածքների հարց, հետևաբար, սա դժվար երկխոսություն կլինի, բայց դա տեղի կունենա»,- ասել է պետության ղեկավարը: