«Արցախցիներին տրվող գումարները Հայաստանում են շրջանառվում». Անուշ Շահրամանյան

Փաստաբան Անուշ Շահրամանյանի ֆեյսբուքյան գրառումը. «Ես չեմ ճանաչում չաշխատող արցախցու՝ ո՛չ հարազատներիս, ո՛չ ընկերներիս, ո՛չ ծանոթներիս մեջ, և սա այն պարագայում, երբ Հայաստանում գործազրկությունը լուրջ խնդիր է, աշխատավարձերը խայտառակ ցածր, մարզերում էլ գործ գտնելը՝ անհավանական։ Սեփական բնակարան չունենալու պայմաններում ինչքա՞ն պետք է վաստակի ընտանիքը՝ Երևանում կամ հարակից քաղաքներում գոյատևելու համար։ Դա հաստատ ամենամսյա 50,000 դրամ տրվող աջակցության գումարը չէ. անհնար է մարդը չաշխատի և այդ գումարով դրսում չհայտնվի։
Այս պահին գործող միակ աջակցության ծրագիրը պարզապես մարդկանց աշխատելու հնարավորություն է տալիս, ոչ ավելին։ «Բնակարանային ապահովման» ծրագիրը չի կարող լուծել արցախցիների բնակարանային ապահովման հարցը, իսկ քանի դեռ այդ հարցը լուծված չէ, 40+10-ը յուրաքանչյուրի մասով պիտի շարունակվի։
Այդ գումարները Հայաստանում են շրջանառվում, ՀՀ քաղաքացիներին են հարստացնում։ Արցախցիները բիզնեսներ են հիմնում, պետական ապարատում, կազմակերպություններում իրենց ուրույն տեղը զբաղեցնում, յուրաքանչյուր արցախցի հարկատու է, և Հայաստանում ապրող յուրաքանչյուր արցախցի հարստացնում, զարգացնում ու հզորացնում է Հայաստանը։ Թող այս պարզ ճշմարտությունը հասկանան այսօրվա հավաքի մասին նյութերի տակ «գնացեք աշխատեք», «երևանցուց լավը չլինեք», «սաղ կյանք մեր վզին եք» «Հայաստանը ձեզ ընդունել ա, էլ ինչ եք ուզում» գրողները կամ մտածողները, որոնց մեջ չեմ բացառում, որ կրթված տգետներ լինեն»: