«Ռուսական նավթի վրա երկրորդային մաքսատուրքեր կսահմանվեն»․ Թրամփ

ԱՄՆ նախագահ Դոնալդ Թրամփը սպառնացել է երկրորդային մաքսատուրքեր սահմանել ռուսական նավթի վրա, եթե Մոսկվան համաձայնության չգա Ուկրաինայում պատերազմը դադարեցնելու և հրադադար հաստատելու հարցում։

«Եթե Ռուսաստանի հետ չկարողանանք համաձայնության գալ Ուկրաինայում արյունահեղությունը դադարեցնելու հարցում, և եթե համոզված լինեմ, որ դա Ռուսաստանի մեղքով է, ինչը կարող է այդպես չլինել, բայց, կարծում եմ, որ այդպես է, ապա մտադիր եմ երկրորդային մաքսատուրքեր սահմանել Ռուսաստանից արտահանվող նավթի վրա»,- NBC-ին տված հարցազրույցում ասել է Թրամփը:

Թրամփը նշել է, որ 25 տոկոս մաքսատուրքերը կարող են սահմանվել ցանկացած պահի, երբ ինքը համոզված լինի, որ պատերազմի մեղավորը Ռուսաստանն է։
Նա նշել է նաև, որ մտադիր է այս շաբաթ զրույց ունենալ Ռուսաստանի նախագահ Վլադիմիր Պուտինի հետ։

Ըստ լրատվամիջոցի՝ Թրամփը վրդովվել էր, երբ Պուտինը կասկածի տակ էր դրել Ուկրաինայի նախագահ Վլադիմիր Զելենսկու լեգիտիմությունը և քննարկել Ուկրաինայում նոր ղեկավարության հնարավորությունը։

Հիշեցնենք, որ Պուտինը հինգշաբթի առաջարկել էր, որ Ուկրաինայում ժամանակավոր կառավարություն ստեղծվի՝ ՄԱԿ-ի հովանու ներքո, սակայն ՄԱԿ-ի գլխավոր քարտուղար Անտոնիո Գուտերեշը մերժել էր առաջարկը՝ նշելով, որ «Ուկրաինան արտաքին վերահսկողության կարիք չունի»։