«Արդյո՞ք իրավիճակի ապակայունացում թույլ չտալու միակ տարբերակը ինքնանվաստացումն է». Հակոբ Բադալյան

Քաղաքական մեկնաբան Հակոբ Բադալյանի թելեգրամյան գրառումը. ««Մենք հրավիրում ենք Ադրբեջանին միանալ մեզ՝ մեր երկու ժողովուրդների համար խաղաղ և բարգավաճ ապագայի ճանապարհին այս կարևոր քայլի իրականացման գործում»: Սա ասում է Հայաստանի խորհրդարանի փոխնախագահը, Միջխորհրդարանական վեհաժողովի շրջանակում:

Մի քանի օր առաջ էլ խորհրդարանի արտաքին հարաբերությունների հանձնաժողովի նախագահն էր Ադրբեջանի իր պաշտոնակցին հրավիրել միասին ինչ-որ բան քննարկելու:

Բնականաբար՝ գրեթե զրո արձագանք:

Լավ, որքա՞ն կարելի է գնալ ինքնանվաստացման ճանապարհով, անունը դնելով, թե դա խաղաղության ճանապարհն է: Իհարկե հասկանալի է, որ Հայաստանի համար ներկայումս շատ կարևոր է թույլ չտալ իրավիճակի ապակայունացում: Բայց, արդյո՞ք այդ խնդրի լուծման միակ տարբերակը այն ինքնանվաստացումն է, որ դրսեւորվում է շարունակաբար:

Որովհետեւ, եթե խնդրի լուծման գինը դա է, ապա դա ոչ թե այդ խնդիրն է լուծում՝ թույլ չտալ էսկալացիայի առիթներ, այլ լուծում է այդպիսի վտանգներից առաջ պարզապես տոտալ բարոյալքման, ոգեթափման խնդիր, որի էֆեկտն իհարկե ստանալու է հակառակորդը:

Այո, կա Հայաստանի կառուցողականությունը միջազգային առանձին դերակատարների մատուցելու եւ այդպիսով որոշակի փաստարկային հենք ունենալու հարց: Բայց, այդ հարցը հնարավոր է լուծել առանց վերը նշածս ինքնանվաստացումների: Որովհետեւ, եթե միջազգային դերակատարներն էլ միայն այդ գնով են պատրաստ «ընդունել», որ Հայաստանը կառուցողական է, ապա խոսքը ոչ թե Հայաստանի կառուցողականության, այլ պարզապես տոտալ ապաշնորհության մասին է, քաղաքական անհամարժեքության:

Իհարկե կան շատ շրջանակներ, որոնք վաղուց խորապես համոզված են, որ դա դիտավորության հետեւանք է: Ինքս առայժմ չեմ հարում այդ տեսակետին, թեեւ ակնառու է, որ իրավիճակը իր աստիճանով վաղուց այնպիսին է, որ այդօրինակ եզրահանգումները առնվազն ունեն միանգամայն տրամաբանական կառուցվածք»: