«Այս անգամ էլ հայ մայրերից ինքնազոհություն է պահանջվելու». Տարոն Սիմոնյան

Իրավաբան, ԱԺ նախկին պատգամավոր Տարոն Սիմոնյանի ֆեյսբուքյան գրառումը․ «Խնդրանքս հայ մայրերին թող զարմանք ու ցասում չառաջացնի, բայց ես այլ տարբերակ չեմ տեսնում մեր խնդիրների լուծման, քան գիտելիքով և արժեքներով հայ մարդու դաստիարակությունն է։ Իսկ այդ գործի ակունքը մայրերն են։
Ուստի այսօրվա իմ շնորհավորանքը ձուլված է խնդրանքին և շնորհակալությանն առ այն, որ այս անգամ էլ նրանցից ինքնազոհություն է պահանջվելու, որովհետև նրանք իրենցից պետք է կտրեն ու քաջություն ներարկեն իրենց զավակներին՝
*քաջություն առ այն, որ կյանքն իմաստ չունի, եթե դրանում արժանապատվություն չկա,
*քաջություն առ այն, որ արժանապատվությունը ձևավորվում է միայն գիտելիքի ու բարոյականության գիտակցումով,
*քաջություն առ այն, որ հնարավոր չէ պարտվել, եթե դու չես հրաժարվում հաղթելու քո իրավունքից,
*քաջություն առ այն, որ մենք, միայն մենք ենք վերականգնելու մեր կյանքի իմաստը, արժանապատվությունը, Արցախը, հայկական միացյալ պետականությունը ու այս մոլորակի վրա մեր տեսակը՝ հայկական քաղաքակրթությունը զարգացնելու մեր առաքելությունը՝ ի բարօրություն մարդկության և ի երաշխավորում նրա առաջընթացի»: