«Իրանի և ԱՄՆ-ի միջև առկա առճակատումը ռազմական լուծում չի կարող ունենալ». Արաղչի

Իրանի և ԱՄՆ-ի միջև առկա առճակատումը ռազմական լուծում չի կարող ունենալ, այս մասին The Washington Post-ի սյունակում հայտարարել է Իրանի արտգործնախարար Աբբաս Արաղչին։
«Առաջ գնալու համար մենք նախ պետք է գիտակցենք, որ «ռազմական տարբերակը» հնարավոր չէ, էլ չասած՝ «ռազմական լուծումը»»,- ընդգծել է նա։

Ինչպես նշել է Իրանի ԱԳՆ ղեկավարը, Թեհրանը չի հավատում, որ ԱՄՆ-ի նախագահ Դոնալդ Թրամփը կցանկանա դառնալ Մերձավոր Արևելքում կործանարար պատերազմի մեջ ներքաշված ամերիկացի հաջորդ առաջնորդը։

Արաղչին նաև հիշեցրել է, որ Իրանը տնտեսապես փակ երկիր չէ, սակայն Սպիտակ տունն ու Քոնգրեսն են, որոնք հետ են «պահում ամերիկյան բիզնեսներն այն տրիլիոն դոլարանոց հնարավորությունից», որը ներկայացնում է Իրանի տնտեսություն մուտքը։

Իրանը նախկինում չէր բացառել ԱՄՆ-ի հետ ուղիղ բանակցությունների հնարավորությունը, սակայն ընդգծել էր, որ Թեհրանը նախքան անձնական հանդիպումներն ակնկալում է Վաշինգթոնից կոնկրետ «բարի կամքի ժեստեր»: