Չինաստանը պատասխան մաքսատուրքեր է սահմանել ամերիկյան ապրանքների վրա՝ 84%

Ամերիկայի Միացյալ Նահանգների հետ առևտրային վեճի շրջանակներում Չինաստանի իշխանությունները հայտարարել են ամերիկյան ապրանքների ներմուծման նոր մաքսատուրքերի՝ 50%-ով ավելացման մասին՝ ի լրումն նախկինում սահմանված 34% մաքսատուրքերի: ԱՄՆ-ի բոլոր ապրանքների մաքսատուրքերն ապրիլի 10-ից ուժի մեջ կմտնեն 84% ընդհանուր դրույքաչափով, չորեքշաբթի օրը՝ ապրիլի 9-ին, Պեկինում հայտնել է Պեկինի ֆինանսների նախարարությունը:
Նախօրեին ԱՄՆ-ի նախագահ Դոնալդ Թրամփը հայտարարել էր Չինաստանից ներմուծման համար լրացուցիչ մաքսատուրքեր սահմանելու մասին՝ 50%-ի չափով։ Դրանք ուժի մեջ են մտել ապրիլի 9-ից՝ նախապես հայտարարված 34% սակագների հետ միաժամանակ։ Արդեն գործող մաքսատուրքերի հետ մեկտեղ՝ ԱՄՆ չինական ապրանքների ներմուծման հատուկ առևտրային տուրքերի ընդհանուր գումարն այսպիսով կազմում է 104%։

Սպիտակ տան մամուլի քարտուղար Քերոլայն Լևիթն ասել է, որ Թրամփը սպասում է Պեկինից զանգի և խոստացել է «բարի լինել, երբ Չինաստանը ձեռք մեկնի իրեն»։ Միևնույն ժամանակ, մեկ օր առաջ ամերիկացի նախագահը բացառել էր Չինաստանի հետ մաքսատուրքերի հետ կապված հետագա բանակցությունների հնարավորությունը։

Թրամփի գործողությունները սուր քննադատության են արժանացել ամբողջ աշխարհի քաղաքական գործիչների և տնտեսագետների կողմից, իսկ ֆոնդային բորսաները առևտրային հակամարտությանը պատասխանել են ինդեքսների զգալի անկումով։ Բացի այդ, նավթի գները կտրուկ նվազել են։ Ամբողջ աշխարհում սպասվում է սպառողական գների աճ և տնտեսական աճի դանդաղում: Ինչպես նշում է dpa գործակալությունը, աշխարհի երկրների մեծ մասի համար նոր առևտրային մաքսատուրքեր մտցնելու՝ Թրամփի որոշումը ամենաագրեսիվ քայլն էր նրա առևտրային քաղաքականության մեջ: