Նոր Հռոմի պապի ընտրության կոնկլավը կսկսվի մայիսի 7-ին

7638

Երկուշաբթի, 28 ապրիլի, 2025 թ., 15:39

Նոր Հռոմի պապի ընտրության նպատակով գաղտնի կոնկլավը (ընտրության գործընթացը) տեղի կունենա մայիսի 7-ին, Reuters-ին հայտնել է Վատիկանի բարձրաստիճան ներկայացուցիչը։

Ըստ գործակալության աղբյուրի՝ ամսաթիվը որոշվել է Վատիկանում կարդինալների փակ նիստում։
Աշխարհի տարբեր ծայրերից մոտ 135 կարդինալներ իրավունք ունեն մասնակցելու կոնկլավին, որտեղ որոշելու՝ ով է լինելու հաջորդ պապը։

Նախորդ երկու կոնկլավները՝ 2005 և 2013 թվականներին, տևել են երկու օր։

Հաղորդվում է, որ Վատիկանի Սիքստինյան կապելլան փակվել է նոր պապի ընտրության կոնկլավին նախապատրաստվելու համար։

Այդ նպատակով պետք է տեղադրվի ծխնելույզ, որտեղից ծուխ դուրս կգա՝ ցույց տալու քվեարկության ընթացքը. եթե ծուխը լինի սև, կնշանակի՝ պապին դեռ չեն ընտրել, սպիտակ ծուխը կավետի պապի ընտրությունը:

Հիշեցնենք՝ Հռոմի պապ Ֆրանցիսկոսը մահացել է ապրիլի 21-ի առավոտյան՝ 88 տարեկանում։ Մահվան պատճառը եղել է կաթվածը։