«Երևանի կանաչապատման ոլորտում տոտալ ֆիասկո է»․ Քրիստինա Վարդանյան

Երևանի ավագանու «Ազգային առաջընթաց» խմբակցության անդամ Քրիստինա Վարդանյանի ֆեյսբուքյան գրառումը․ «Կարծում եմ՝ հիշում եք, ինչպես էր քաղաքապետն անվերջ համեմատում նախկինում ծառերի կպչողականությունն ու ներկայումս՝ նշելով 94-100% աննախադեպ հեքիաթային արդյունքը։ Երեկ զբոսնեցի կենտրոնի մի փոքրիկ հատվածով, տեսա եզակի կպչողականությունը, ստորև կնշեմ միայն փաստեր.
-նախկինում գնած տնկանյութն արժեր 3000-5000 դրամ, հիմա՝ 70 000-155 000, այսինքն՝ 23- 31 անգամ ավել, -նախկինում տնկված բույսերը՝ փողոցներով հատված լայնասաղարթ ծառերի փոխարեն չեն տնկվել, այլ ի հավելումն, քանզի քաղաքում 5 անգամ պակաս է կանաչը, -նախկինում տեսակների սանիտարական ֆունկցիոնալությունը չեն փոխարինել դեկորատիվ-էսթետիկով՝ հացենու փոխարեն տնկել սակուրա կամ թեղու փոխարեն ալբիցիա և կատալպա,
-նախկինում լայնասաղարթի փոխարեն չեն տնկել անսաղարթ գնդաձև պարտիզային ձևեր,
-նախկինում տասնյակ հազարներով չեն գնել թափոն տնկանյութ, որը ոչ մի ստանդարտի չի համապատասխանում՝ ալբիցիաներն ու հուդայածառերը հիանալի «հատակի փայտ են», բայց ոչ այդ գնի տնկանյութ, և այդպես շարունակ։ Իրավապահները խնդիր չեն տեսնում, միգուցե, որ նույն թիմն են, համառորեն չեն նկատում միջոցների ահռելի վատնումը, միլիոնների անիմաստ ծախսերը, գիտության հետ աղերս չունեցող որոշումները, ժամանակակից կանաչապատման պահանջներին մասնագիտական անհամապատասխանությունը, ինչը պարզ երևում է արդյունքից և ամենակարևորը՝ բնակչության առողջության և կյանքի համար ստեղծված հսկայական ռիսկերը։ Ի վերջո, գիտակցելո՞ւ եք, որ ձեր երեխաները կյանքն է զոհասեղանին… Սրա՞նք են ձեր հեղափոխական մոտեցումները մեր ոլորտում։
Հարգելիներս, սա տոտալ ֆիասկո է, ծանր հետևանքներով բոլորիս համար։ Գրառումս՝ լիազորություններիս շրջանակում է, որպես ՀՀ ԲՈՀ-ի վկայականով ամրագրված ոլորտի մասնագետ և Երևան քաղաքի ավագանու անդամ»։