Քրեական գործերի, կասկածելի գործարքների և խախտումների տակ կքած Միքայել Ադամյանը մեղադրում է լրատվամիջոցին՝ իրական փաստեր հրապարակելու մեջ

Երևանի քաղաքապետարանի ենթակայությամբ գործող Նորք Մարաշ ԲԿ-ում տեղի ունեցած առեղծվածային և ողբերգական մահերի, բուժանձնակազմի՝ բժշկական էթիկայից դուրս վարքագիծը մերկացնող տեսանյութերի և ձայնագրությունների հրապարակումներից հետո, ԲԿ-ի տնօրեն Միքայել Ադամյանը հայցադիմում է ներկայացրել խմբագրության դեմ։

Վերջինիս անհանգստացրել է, որ խմբագրությունը քաղաքացիների ահազանգերով հավաքագրել և հրապարակել է իր ղեկավարած ԲԿ-ում տեղի ունեցող ողբերգական միջադեպերի իրական պատմությունների մանրամասները։

Հատկանշական է, որ այս անձի ղեկավարման տարիներին, Նորք Մարաշ ԲԿ-ն իրականացրել է կասկածելի գործարքներ, խախտումներ և 2022 թվականից անցնում է քրեական մի քանի գործերով․

• 66 մլն դրամով գնվել է վիրահատական սարք, որը չի օգտագործվում։
• Բյուջե չի մուտքագրվել 30 մլն դրամ։
• ԲԿ-ն շրջանցում է «Գնումների մասին» օրենքը և զանգով պատվերներ կատարում։
• ԲԿ-ն վնասով է աշխատել և այլն։

Հետք լրատվականի բացահայտումներից տեղեկանում ենք նաև, որ հարուցվել է 2 քրեական գործ։ Ավելին, ԲԿ-ում բացահայտումներ է կատարել նաև ՊՎԾ-ն։

Հետաքրքիր է, որ ԲԿ-ի տնօրեն Միքայել Ադամյանը վերոնշյալ բացահայտումների մասին հրապարակումները զրպարտություն չի համարել և չի բողոքարկել դրանք։ Այդ մասին տեղեկանում ենք դատական տեղեկատվական համակարգից։

ՄԱՄՈՒԼ.am-ի հարցմանն ի պատասխան Քննչական կոմիտեից տեղեկացրեցին, որ նշված դեպքերի մասով հարուցվել է քրեական գործ՝ «ՀՀ քրեական օրենսգրքի 214-րդ հոդվածի 1-ին մասի հատկանիշներով»։

Խմբագրությունը սկսել է հետաքննել վերոնշյալ գործերը և նոր հարցումներ է ուղղել Դատախազություն, Քննչական կոմիտե, Երևանի քաղաքապետարան և առաջիկայում կներկայացնենք դրանք հերթականությամբ։

ՈՒՇԱԴՐՈՒԹՅՈՒՆ

Եթե Դուք (Ձեր հարազատները) տուժել եք վերոնշյալ անձի, կամ ԲԿ-ի այլ աշխատակիցների գործողություններից, կարող եք զանգահարել խմբագրության (010 55 20 59), կամ գրել (ձայնագրություններ, տեսագրություններ, այլ) [email protected] հասցեին, կամ ֆեյսբուքի էջին։

Խմբագրությունը երաշխավորում է տեղեկատվություն տրամադրող անձի գաղտնիությունը։