«Վտանգավոր սրացում»․ Գուտերեշը՝ Իրանի միջուկային օբյեկտների ռմբակոծության մասին

ՄԱԿ-ի գլխավոր քարտուղար Անտոնիո Գուտերեշը ԱՄՆ-ի կողմից Իրանի միջուկային օբյեկտների ռմբակոծությունը անվանել է տարածաշրջանում վտանգավոր սրացում և խաղաղության ու անվտանգության ուղղակի սպառնալիք։ Գուտերեշի հայտարարությունը հրապարակվել է ՄԱԿ-ի կայքում։

Գլխավոր քարտուղարը նշել է, որ հակամարտությունը կարող է արագորեն դուրս գալ վերահսկողությունից, և նման արդյունքի ռիսկը միայն աճում է։ Գուտերեշի խոսքով՝ նման սցենարը կունենա աղետալի հետևանքներ տարածաշրջանի քաղաքացիական բնակչության և ամբողջ աշխարհի համար։

«Ռազմական լուծում չկա։ Առաջ շարժվելու միակ ճանապարհը դիվանագիտությունն է։ Միակ հույսը խաղաղությունն է», - ասել է նա՝ կոչ անելով ՄԱԿ-ի անդամ պետություններին թուլացնել լարվածությունը, պահպանել ՄԱԿ-ի կանոնադրությունը և միջազգային իրավունքը։
«Այս վտանգավոր ժամին անհրաժեշտ է խուսափել քաոսի պարույրից», - ասել է Գուտերեշը։