«Ուկրաինայում հակամարտությունը կարող է տևել ևս մի քանի տարի»․ Կալլաս

ԵՄ արտաքին գործերի և անվտանգության քաղաքականության գերագույն ներկայացուցիչ Կայա Կալլասը կարծիք է հայտնել, որ Ուկրաինայում հակամարտությունը կարող է տևել ևս մի քանի տարի։

ԵՄ դիվանագիտության ղեկավարը ներկայացրել է իրավիճակի զարգացման հնարավոր, իր տեսանկյունից, սցենարներ։ «Կարծում եմ, որ իրատեսական [սցենարը] այն է, որ պատերազմը կտևի ևս մի քանի տարի», - ասել է նա մի շարք լրատվամիջոցների, այդ թվում՝ EFE գործակալության հետ հարցազրույցում։ «Ցավոք, խաղաղության հասնելու ջանքերը, այդ թվում՝ [ԱՄՆ] նախագահ Դոնալդ Թրամփի կողմից, որևէ արդյունք չեն տվել»։ Հոռետեսական սցենարում, ըստ Կալլասի, Ուկրաինան ստիպված կլինի զիջել իր տարածքները։

Ինչ վերաբերում է Չինաստանին, նա կարծում է, որ ԵՄ-ի համար նրա կողմից առաջադրվող երկու հիմնական խնդիրներն են՝ Ռուսաստանին Ուկրաինայի հակամարտության մեջ ցուցաբերած աջակցությունը և «հարկադրական տնտեսական գործելակերպը»։ «Մենք պատրաստ չենք գործել որպես համաշխարհային խաղացող Չինաստանի հարցում, քանի որ չունենք ընդհանուր տեսլական այն մասին, թե ինչ պետք է արվի», - հավելել է Կալլասը։