Ագմատինի և թիամինի անբավարարությունը կարող է կարևոր դեր խաղալ գլաուկոմայի զարգացման հարցում

Ագմատինի և թիամինի (B1 վիտամին) բնական նյութերի անբավարարությունը կարող է կարևոր դեր խաղալ գլաուկոմայի զարգացման հարցում։ Այս եզրակացությանն են եկել Միսսուրիի համալսարանի բժշկական ֆակուլտետի գիտնականները։ Հետազոտության արդյունքները հրապարակվել են Investigative Ophthalmology & Visual Science (IOVS) ամսագրում։

Գլաուկոման աչքի հիվանդությունների խմբի ընդհանուր անվանում է, որոնց դեպքում ներակնային ճնշումը մշտապես կամ պարբերաբար բարձրանում է։ Արդյունքում տեղի են ունենում անդառնալի փոփոխություններ ցանցաթաղանթում և վնասվում է տեսողական նյարդը, ինչը կարող է բերել տեսողության խանգարման և նույնիսկ կուրության։

Գիտնականների խումբը հետազոտել է գլաուկոմայով տառապող 19 հիվանդների և 10 առողջ կամավորների աչքային հեղուկը՝ ուսումնասիրելով 135 մետաբոլիտ։ Գլաուկոմա ունեցող անհատների մոտ ագմատինի և թիամինի մակարդակները եղել են նորմայից զգալիորեն ցածր։ Հետազոտողների խոսքով՝ այդ նվազումը կարող է ուժեղացնել բորբոքումը և առաջացնել ցանցաթաղանթի նյարդային բջիջների մահ, ինչը հանգեցնում է տեսողության անդառնալի կորուստի։