«Հերոսներին նսեմացնելու ծրագիրը եղել է դեռևս մինչև 2020 թվականի պատերազմը»․ Ոսկան Սարգսյան

Լրագրող Ոսկան Սարգսյանի գրառումը․ «Մեր հաղթական ազատամարտը, պատերազմի մեր հերոսներին նսեմացնելու, նրանց սխրանքը, անձնազոհությունը նյութական արժեքներին, բարեկեցիկ ապրելուն ստորադասելու ծրագիրը եղել է դեռևս մինչև 2020 թվականի 44-օրյա պատերազմը, մինչև այդ պատերազմում մեր պարտությունը։ ՔՊ-ական իշխանությանը մոտ եղած մարդիկ տեղյակ են եղել այդ ծրագրին ու նրանցից մեկը ժամանակից շուտ բացահայտել է այն։ Հայկ Չոբանյանը Տավուշի մարզպետ է նշանակվել 2019թ․ փետրվարի 6-ին, այդ պաշտոնից ազատվել է 2021թ․ ապրիլի 1-ին։ Որպես մարզպետ պաշտոնավարելու ժամանակ Հայկ Չոբանյանը մի քանի անգամ հրապարակային կերպով հայտարարել է, որ հերոսները գործարարներն են, ովքեր աշխատատեղեր են ստեղծում։ Մասնավորապես, 2019թ․ դեկտեմբերի 25-ին Հ․ Չոբանյանը հանդիպելով Տավուշի մարզի գործարարների հետ՝ հայտարարել է․ «Երկիրը կառուցում է ձեռներեցը, երկրի հերոսը ձեռներեցն է»։ Հիմա «հերոս գործարարներին», ովքեր հանգգնել են քաղաքականությամբ զբաղվել, քննադատել Նիկոլ Փաշինյանին, սեփականությունից զրկում են, Սամվել Կարապետյանից խլել են ՀԷՑ-ը, Գագիկ Ծառուկյանի բիզնեսները խլում են, հազարավոր աշխատատեղեր փակում»։