Ռուս ռեկորդակիր Սերգեյ Սերգիենկոն մահացել է 6000 մետր բարձրությունից պարաշյուտով ցատկելիս

Ռուս ռեկորդակիր Սերգեյ Սերգիենկոն մահացել է 6000 մետր բարձրությունից պարաշյուտով ցատկելիս, հաղորդում է ՏԱՍՍ-ը՝ հղում անելով Ռուսաստանի պարաշյուտային ֆեդերացիայի փոխնախագահ Վադիմ Նիյազովին։

Ողբերգությունը տեղի է ունեցել հոկտեմբերի 4-ին Ռյազանի մարզի Կրուտիցի օդանավակայանում։ Նիյազովի խոսքով՝ Սերգիենկոն կորցրել է պարաշյուտի կառավարումը վայրէջքի ժամանակ, քանի որ, ականատեսների վկայությամբ, «նրա վերջին մանևրը շատ ագրեսիվ էր»։ Պարաշյուտիստը բազմաթիվ վնասվածքներ է ստացել գետնին բախվելուց հետո։ Նա հոսպիտալացվել է, սակայն բժիշկներին չի հաջողվել փրկել նրան։ Սերգիենկոն 57 տարեկան էր։

Նա 22 հոգանոց թիմի անդամ էր, որը 2019 թվականին հաջողությամբ կազմավորեպ է 4 ֆիգուր՝ սահմանելով համաշխարհային ռեկորդ։ Սերգիենկոյի մասնակցությամբ թիմերը նաև ռեկորդներ են սահմանել մեծ կազմավորման դասում, որոնք սահմանվել են 2013-2014 թվականներին։

Անցյալ տարի նմանատիպ մեկ այլ ողբերգություն տեղի ունեցավ Մոսկվայի մարզում։ Փորձառու պարաշյուտիստը, որն ավելի քան 2000 ցատկ էր կատարել, մահացավ անհաջող վայրէջքի ժամանակ։