«Ինչու Ադրբեջանը չի ցանկանում Հայաստանի հետ խաղաղության փաստաթուղթ ստորագրել»․ Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Բազմաթիվ հանգամանքներ և պատճառներ կարելի է թվարկել, թե ինչու Ադրբեջանը չի ցանկանում Հայաստանի հետ խաղաղության փաստաթուղթ ստորագրել անգամ պատերազմում հաղթելուց, Արցախը գրավելուց և հայաթափելուց, Հայաստանի սուվերեն տարածքներից մոտ 200 քառակուսի կիլոմետր զավթելուց հետո: Հակահայկականությունը դարձել է արևելյան հարևանի հիմնական գաղափարախոսությունը, ազգային ծրագիրն ու ադրբեջանական ժողովրդի ամենատարբեր հատվածներին սոսնձող գործոնը: Բավական է այն թուլանա, և այդ երկրի ներսում սկսվում են ներքին գործընթացներ: Հատկապես ժողովրդավարության բացակայության և կոշտ ավտորիտար կառավարման պայմաններում յուրաքանչյուր ներքին խնդիր կարող է բողոքի ալիքի պատճառ դառնալ:
Մոտ 25 տարի առաջ՝ 2002 թվականին, ես սովորում էի Թբիլիսիի ամերիկյան մի դպրոցում, որտեղ, նույն լսարանում, ինձ հետ էին նաև 4 ադրբեջանցի և 30 վրացի: Միակ հայն էի և հատկապես վրացի աղջիկների հետ ունեի ջերմ և ընկերական հարաբերություններ: Չորս ադրբեջանցիներից մեկը աղջիկ էր, ով առաջին օրերին ինձ ընդհանրապես չէր նայում: Որոշ ժամանակ անց սկսեց նայել իմ ուղղությամբ, ապա՝ առավոտները բարևել, հետո զրուցել.... Մի քանի ամիս անց նա ինձ պատմեց, որ կյանքում առաջին անգամ է կենդանի հայ տեսնում, այն էլ՝ այդքան մոտիկից: Մարդուն այնքան էին հակահայ թույն սրսկել, որ հային, տվյալ դեպքում՝ ինձ, պատկերացնում էր մի հրեշ...»։