«Զվարթնոցի» մաքսատանը հափշտակել են ի պահ տված 30.000 դոլարը

MakaryanNews-ը հայտնում է․ «Մեր տեղեկությունների համաձայն՝ օրեր առաջ արտակարգ դեպք է բացահայտվել «Զվարթնոց» օդանավակայանի մաքսատանը: Մեզ ասացին, որ մոտ մեկ տարի առաջ Երևան ժամանած քաղաքացու մոտ հայտարարագրման ենթակա 30.000 դոլար գումար է հայտնաբերվել, որը քաղաքացին ստիպված է եղել ի պահ հանձնել մաքսային ծառայողնեին, որ վերադառնալիս նորից հետ վերցնի իր փողը:

Մոտ մեկ տարի այդ գումարը մնացել է մաքսատանը, թվում է թե՝ ապահով ձեռքերում: Բայց մոտ մեկ շաբաթ առաջ «Զվարթնոց» մաքսատան նորանշանակ պետ Հայկ Մելքոնյանը ստուգել է ու պարզել, որ իրենց մոտ ի պահ թողնված 30.000 դոլարը կեղծ է: Մասնավորապես, դոլարների կապոցների դիմացի ու հետևի 100 դոլարանոցները իրական են եղել, իսկ մնացածը՝ կեղծ: Այսինքն՝ ինչ-որ մեկը հափշտակել է իրական դոլարներն ու տեղը կեղծ թղթադրամներ դրել:

Մենք այս տեղեկությունը ճշտեցինք Մասքսայինի հետ ուղիղ առնչություն ունեցող երեք տարբեր աղբյուրից, երեքն էլ հաստատեցին, որ այդպիսի դեպք իրապես տեղի է ունեցել:

Զանգահարեցինք նաև «Զվարթնոց» մաքսատան պետ, նույն ինքը՝ ՀՀ ՊԵԿ Էլեկտրոնային առևտրի և օդային տրանսպորտով փոխադրումների վարչության պետ Հայկ Մելքոնյանին, որ իրենից մեկնաբանություն ստանանք, քանզի ասացին՝ հենց նա է բացահայտել դեպքը:

Մելքոնյանը, սակայն, ոչ թե հերքեց կամ հաստատեց մեր տեղեկությունը, այլ հորդորեց դիմել ՊԵԿ լրատվական ծառայությանը, որպեսզի լրատվականը որոշի՝ դա հրապարակման ենթակա՞ ինֆորմացիա է, թե՞ ոչ: Նաև ասաց՝ չի հիշում, թե կոնկրետ որ դեպքի մասին է, քանզի հաճախակի են այդպիսի դեպքեր լինում իրենց մոտ: Այսինքն՝ չհերքեց, որ նման դեպք է տեղի ունեցել, պարզապես չցանկացավ իր վրա վերցնել պատասխանատվությունն ու մանրամասնել՝ թողնելով լրատվականի վրա այդ «ծանր բեռը»»: