ՄՕԿ նախագահը հավաստիացրել է՝ օլիմպիադան հաջող է կայացել

Միջազգային օլիմպիական կոմիտեի նախագահը լրագրողների հետ ճեպազրույցում վստահեցրել է, որ չնայած կորոնավիրուսի պատճառով առաջացած դժվարություններին, օլիմպիական խաղերը բարեհաջող են ընթացել: Թոմաս Բախը մասնավորապես նշել է. «Մենք անցկացրեցինք Օլիմպիական հաջող խաղեր՝ չնայած ներկա ժամանակների բոլոր դժվարություններին»:

Ըստ Բախի՝ Ճապոնիայում անցկացվող մրցումների մասնակիցների կորոնավիրուսի թեստերի ընդամենը 0,02%-ն է դրական արդյունք ցույց տվել, ինչը շատ ցածր ցուցանիշ է: «Օլիմպիադայի պատճառով կորոնավիրուսը չի տարածվի»,- հավելել է Բախը:

Ըստ օգոստոսի 8-ի տվյալների, օլիմպիադային մասնակցածներից միայն 430-ի մոտ է հաստատվել կորոնավիրուսի առկայություն: Բոլոր մասնակիցները դիմակներ են կրել այն վայրերում, որտեղ դա պահանջել է ադմինիստրացիան: