Իլոն Մասքն ազդարարել է 2022-ին մարդանման ռոբոտի հայտնվելու մասին

4383

Ուրբաթ, 20 օգոստոսի, 2021 թ., 22:36

Tesla Inc ընկերությունը՝ ի դեմս Իլոն Մասքի, հայտարարել է 2022 թվականին սեփական մշակման Tesla Bot կոչվող նախատիպային մարդանման-ռոբոտի մոդել ստեղծելու մասին, փոխանցում է CNBC գործակալությունը:

Նորույթի շնորհանդեսը տեղի է ունեցել արհեստական բանականությանը նվիրված միջոցառման ժամանակ՝ Քալիֆորնիայի Պալո-Ալտո քաղաքում, ուր գտնվում է ընկերության գլխավոր գրասենյակը: Ամերիկացի գործարարն ու SpaceX ընկերության հիմնադիրը պարզաբանել է, որ ռոբոտի հասակը կազմելու է 172 սմ, քաշը՝ 57 կգ, դեմքի փոխարեն կլինի էկրան, որտեղ կներկայացվի օգտակար տեղեկատվություն:

Ռոբոտը կօգտագործի արհեստական բանականության սարքերից մի քանիսը, որոնք արդեն կիրառվում են ընկերության ավտոմեքենաներում: Օրինակ, նրա տեսողությունն ապահովելու են Tesla-ի ինքնակառավարվող մեքենաների համար նախատեսված խցիկները:

Գործարարի խոսքով, ռոբոտն օգտակար կլինի նաև կենցաղում: Մարդիկ կկարողանան օգտվել «տան նոր անդամի» ծառայություններից, որը կկարողանա գնալ խանութ՝ գնումների և կատարել այլ հրահանգներ: