Կառավարությունից ասել են, որ գերիների նոր խումբ է վերադառնալու

Բաքվում գտնվող հայ գերիների խմբի վերադարձ է նախատեսված, սակայն ժամկետներ հայտնի չեն։ Այս մասին 24News-ի հետ զրույցում ասաց 2020 թվականի դեկտեմբերին գերեվարված շիրակցի պահեստազորային Հայկազ Հովհաննիսյանի եղբայրը՝ Արկադի Հովհաննիսյանը։
Նա նշել է, որ կառավարության բարձրաստիճան պաշտոնյա է իրեն և ևս մի քանի ծնողների այս տեղեկությունը հայտնել։ Ըստ նրա՝ պաշտոնապես 46 հոգի հաստատված գերի կա․ «Ուրիշ թիվ չգիտենք»։

Հայկազ Հովհաննիսյանը 2020 թվականի դեկտեմբերին գերեվարված 64 պահեստազորայինների թվում էր։ 2020 թվականի նոյեմբերի 9-ի եռակողմ հայտարարությունից հետո Հադրութի շրջանի Խծաբերդ և Հին Թաղեր գյուղերի դիրքերից գերեվարվել էին 64 պահեստազորայիններ, որոնցից 62-ը Շիրակի մարզից էին․ շիրակցիներից 29-ն է հայրենադարձվել։ Հունվարի 11-ին մոտ 9 ժամ կառավարության շենքի առջև բողոքի ակցիա իրականացնելուց հետո գերիների հարազատներին երեկոյան կառավարությունում բարձրաստիճան պաշտոնյա էր ընդունել ու հուսադրել, որ հնարավոր է գերիների նոր խմբի վերադարձ։