«Ռուսաստանն իր պահանջներով փչացրեց ամեն ինչ»․ Զելենսկի

2022-ին Ստամբուլում բանակցությունների ժամանակ Ռուսաստանն Ուկրաինայից պահանջել է երկրի ղեկավար նշանակել Գերագույն ռադայի նախկին պատգամավոր, ռուսամետ Վիկտոր Մեդվեդչուկին։ Այս մասին Ուկրաինայի նախագահ Վլադիմիր Զելենսկին հայտնել է Դավոսում՝ ԶԼՄ-ների ներկայացուցիչների հետ հարցազրույցի ժամանակ։

Նա ընդգծել է, որ ՌԴ-ն նաև պահանջել է, որ Դոնբասն ամբողջությամբ անցնի Մոսկվայի վերահսկողությանը, իսկ Ուկրաինան պետք է ճանաչի դա՝ փոփոխելով Սահմանադրությունը։ Ռուսաստանի մեկ այլ պահանջ էր՝ կրճատել ուկրաինական բանակի թվաքանակը մինչև 50 հազարի և քվեարկել երկրի չեզոք կարգավիճակի օգտին։ Առանձին նշվել էր, որ ռուսերենը պետք է դառնա պետական ​​լեզու։

Բացի այդ, Ստամբուլում բանակցությունների ժամանակ ռուսական կողմը ցանկանում էր, որ Ուկրաինան վերացնի 20 կմ-ից ավելի հեռահարությամբ իր բոլոր զինատեսակները։

«Չկան թուրքական բանակցություններ, կա միայն վերջնագիր մարդասպանի կողմից, որի ազգանունը Պուտին է»,- Մոսկվայի պահանջներն է մեկնաբանել Զելենսկին։

Նրա խոսքով՝ Բելառուսն ու Թուրքիան ցանկանում էին ազդել բանակցությունների ընթացքի վրա, սակայն Ռուսաստանն իր պահանջներով փչացրեց ամեն ինչ։