Ողջաբերդի բնակիչները փակել են գյուղի ճանապարհը․ ՈՒՂԻՂ ՄԻԱՑՈՒՄ

Կոտայքի մարզի Ողջաբերդ գյուղի բնակիչները կրկին փակել են գյուղի ճանապարհը։ Նրանք պահանջում են հետ վերադարձնել գյուղի վարչական ղեկավար Աշոտ Մուշեղյանին, որի լիազորությունները կասեցվել էին ամիսներ առաջ։

Նախորդ ակցիայի ժամանակ բնակիչները հայտնել էին, որ Աշոտ Մուշեղյանի լիազորությունները ժամանակավոր էին կասեցվել քրեական վարույթի շրջանակում, և այդ ընթացքում գյուղը չուներ վարչական ղեկավար։

«Հիմա, երբ արդեն քրեական վարույթը չկա, Աշոտ Մուշեղյանն էլ արդարացվել է, իմանում ենք, որ նոր գյուղապետ են նշանակել»,–ասում են նրանք՝ արարաքը համարելով անօրինական։ «Ամբողջ գյուղը դեմ է նոր գյուղապետին, ով նախկին գյուղապետի որդին է, նրան նշանակել են ժողովրդի կամքին հակառակ»,- ասում են բնակիչները։ Նրանք պահանջում են վարչապետ Նիկոլ Փաշինյանին՝ լուծել խնդիրը։ «Մեր դիմումը վարչապետի սեղանին է արդեն, խնդրում ենք մեզ ընդունել ու լսել»,- ասում են բնակիչները։