«Եվրոպայի արձագանքն ԱՄՆ մաքսատուրքերին պետք է լինի կոշտ»․ Մակրոն

Ֆրանսիան և Գերմանիան կոչ են անում կոշտ և միասնական արձագանքել ԱՄՆ մաքսատուրքերին, Bloomberg-ի փոխանցմամբ՝ հայտարարել է Ֆրանսիայի նախագահ Էմանուել Մակրոնը։

«Եվրոպայի արձագանքը բաղկացած է երկու փուլից՝ առաջինը կլինի ապրիլի կեսերին, երկրորդը՝ ապրիլի վերջին՝ մանրակրկիտ վերլուծությունից հետո»,- ասել է Մակրոնը։

Նա ընդգծել է, որ ֆրանսիական ընկերությունները պետք է դադարեցնեն ցանկացած ներդրում ԱՄՆ-ում՝ «մինչև իրավիճակը հստակեցվի»։

«Եվրոմիության հզորությունը նրա 450 միլիոնանոց շուկան է, որն ավելի մեծ է, քան ԱՄՆ շուկան»,- հավելել է Ֆրանսիայի նախագահը։

Փարիզը ցանկանում է համոզվել, որ ԵՄ-ի պատասխանը ԱՄՆ մաքսատուրքերին կներառի դաշինքի ողջ գործիքակազմը՝ սեփական շահերը պաշտպանելու համար, գրում է Bloomberg-ը:

Հիշեցնենք, որ ԱՄՆ նախագահ Դոնալդ Թրամփը նախօրեին հայտարարել էր Միացյալ Նահանգների առևտրային գործընկերների ճնշող մեծամասնության նկատմամբ առևտրային մաքսատուրքեր սահմանելու մասին։

ԵՄ անդամ երկրների ներմուծման մաքսատուրքերը կկազմեն 20 տոկոս։